Enwer Yılmaz
Futbol tena kayêkê topa ke mîyanê çar xetanê sipîyan de yeno kaykerdiş nîyo; tayê taximî estê ke benê veng, nefes, nasname û şayîya şarêkî. Seba ma zî Amedspor tam manaya xo wina yo. Ez sey yew heskerdoxê Amedsporî, her maçê ey bi kelecanêko pîl tqîb kena. Taximê ma yo ke par bi têkoşînêkê bêemsal Lîga Yewine ra vejîya Lîga Supere, emser serra xo ya verêne ya Lîga Supere de destanêka newe nuseno.
Amedspor êdî tena taximê şaristanê Amedî nîyo; Amedspor bîyo taximê heme kurdan. Ewro her goşeyê welatî ra bigîrê heta teberê welatî, Ewropa ra heta Amerîka bi mîlyonan terefdarê Amedsporî estê. Şarê ma kamca de beno wa bibo, bi hîsanê kurdewarîyan wayîrê taximê xo yê kesk û sûrî vejîyeno, bi serkewtişanê ey şa beno û bi kayê ey serberzîye hîs keno. Amedsporî bi futbolê xo yê weş û têkoşînê xo yê warê kayî de zerrîya her kesî de ca girewto.
Eke ma biewnîyê tabloyê Lîga Supere ya Trendyolî ra, ma vînenê ke Amedspor serra xo ya verêne de rêzanê tewr corênan de ca gêno û seba şampîyonîye û lîderîye têkoşîn dano. Taximê ma yo kesk û sûr 8 hewteyanê vîyarteyan de 5 serkewtişî, 2 seypêmendişî û tena 1 binkewtiş girewtê û bi 17 puanan rêza diyîne de, tena 2 puanî peyê lîder Galatasarayî de ca gêno. Emşo hewteyê 9. de amancê ma o yo ke ma serkewtişê xo yê 6. bigîrê, puananê xo biresnê 20î û bibe lîderî!
Maçanê peyênan de zî taximê ma qewet û karakterê xo mojna. Hewteyê 7. de Amedspor deplasman de Gençlerbirliğî dir ame têver. Ê maçî de ekîpa ma ya keske û sûre bi golanê Dia Saba û Samuel Balletî di reyî kewt vernî; herçiqas deqaya 90+3. de golêk werd û maç 2-2 seypê qedîya zî, Amedsporî deplasman de kayêko zaf xurt kay kerd û bi yew puan agêra. Hewteyê 8. de ise Amedsporî keyeyê xo de, verê çimanê terefdaranê xo yê wefadaran de Konyaspor kerd mêman û bi golê Diagneyî reqîbê xo 1-0 mexlûb kerd û puanê xo vetî 17î.
Nika çim û zerrîya mîlyonan terefdaranê kurdan açarîyayo maçê emşoyî ser. Hewteyê 9. ê Lîga Supere ya Trendyolî de Amedspor emşo beno mêmanê Samsunsporî. Maço ke do Stadyûmê 19ê Gulane yê Neweyî yê Samsunî de saete 19.00 de dest pêbikero, hekemê ci Kadîr Saglam o û maç ekrananê beIN SPORTS 1î ra bi weşano ganî do bêro weşanayîş. Yeno pawitiş ke Amedsporê ma bi kadroyê Lafont, Krasniqi, Mehmet Yeşîl, Bates, Umut, Furkan, Raveloson, Saba, Ballet, Lutin û Orbanî vejîyo kayî.
Reqîbê ma Samsunspor, yanî temsîlkarê Deryayê Sîyayî, lîge de rojanê zehmetinan ra ravêreno. Samsunsporo ke 6 maçanê xo yê peyênan ra bi binkewtiş vejîyayo û maçê xo yo peyên de zî vera Kasimpaşayî 4-1 bin kewto, bi 4 puanan rêza 17. de yo. Bêguman ê zî wazenê vera ma de peynî bidê şîyayîşê xo yê xirabî, labelê hêz, moral û bawerîya Amedsporî her çîyî ra berzêr a.
Emşo saete 19.00 de tena Amed de nê, Dêrsim, Çewlîg, Xarpêt, Mêrdîn, Wan, Hewlêr, Qamişlo, Berlîn, Parîs û Washington de zî zerrîya mîlyonan kurdan do seba renganê kesk û sûran bierzîyo. Hêvî û bawerîya ma tam a ke Amedspor do emşo Samsun ra bi serkewtişê xo yê şeşinî û bi 20 puanan sey lîderê Lîga Supere agêro Amed! Rayîrê to akerde bo Amedspor!
