Murad Canşad
Toreyo verên o; seba ke bihuyê û keyfê xo biyero, şinas û dostî yewbînan rê fiqrayan vanê. No tore mîyanê milletî de winî ca bîyo ke xususen seba fiqrayan kesê xeyalîyî afernayê, nameyê înan se ra fiqrayî vatê/vetê, pê huyayê. Sey Nesredîn Xoce û Behlulo Dîwane.
Mi zî şinas û dostanê xo rê zaf fiqrayî vatê. Wexto ke ma doman bîyî, mekteb de fiqrayê Nesredîn Xoceyî vatêne. O wext keyfê ma pê ameyêne. Nika keyfê mi bi înan nêyeno. Ez ne vana ne zî goşdarî kena. Wexto ke mecburî goşdarî bikera zî tamê fekê mi beno tal. Mi rê bê mana yenê. La fiqrayê weşî bibê, ez embazanê dormeyê xo rê vana. Êyê ke bi zazakî vacîyayê, ez nusena ke vîndî mebê.
Fiqrayan ra teber, ez embazanê dormeyê xo rê behsê karîkaturan û nuşteyanê dêsan kena. Tayê karîkatur û nuşteyê dêsan est ê ke fiqrayan ra cêr nîyê. Tey de komedîyo weşo aqilane est o. Beno ke merdim sey fiqrayan yewbînan rê bivaco.
Unîversîta de mewcudê ma zaf qelebelix bî. Fakultaya ma de çendayê hezar telebeyî est bîyî. Îdareyê fakulta aye gore tedarike xo vînayêne, her çî zêde ra zêde girewtêne.
Awdestxane camêrdan de, seba awdestê pîlî da-des çimeyî têkîştî de rêz bîbî. Duştê înan ra zî seba awdestê şenikî da-vîst pîsuvarî besnabî dês ra. Mabên de tîk û kilmver salê mermerî dusnabî dês ra, kerdbî qisim bi qisim. Merdim ke şî ser, nohet-ohet de salê mermerî yenê resenê kalekan.
Pîsuvarî, seramîkê sipîyî bîyî. Tim pak kerdêne; sey vewre beriqîyayêne. Tasa xo, şekilê kefgiran de bine ra qulikin bîyê. Ernetê gilorê sey torge ra çengêk eştene bi ci; cor de awe dilopîyayêne ser, zerre ra boye-moye nêameyêne.
Ez kewta zerre, şîya pîsuvarêk ser. Haşa şima ra, mi tengîya xo vîyarnaye. Wexto ke ez hindî barê xo ra xelisîyena û canê mi beno rahet, rîyê dêsî ra çîyêk kewt çimanê mi ver. Bi qelema hubrine nuşteyêko hurdîyo hurdîlek. Sey slogananê çepgiran gird û qeba nîyo. Ohet ra nêkeweno zerreye lîlikanê merdimî. Merdim ke xususen meewno pira, nêzaneno çi nuşte yo.
Mi çimî ziq kerdî ser, sere çendêk aver berd. Destê mi hîna pîzeyê şenikî ser ra yo. Ez ewnîyaya nuşteyî ra. Sey ke yewer goşê mi de piste-pist bikero:
Ero, qîymetê êyê destê xo bizane!
