Murad Canşad
Wexto ke ez doman bîya, radyoyêkê ma yo girs est bî. Vengê xo gurr vecîyayêne. O wext tenya çend kanalê TRTyî (radyoyê Anqara, radyoyê Erziromî, radyoyê Îstanbulî ûsn.) est bîyî. TRT ra teber radyoyî çin bîyî. Weşanê radyoyan dahîna zêde deyîran ser ro bî. Ma dahîna zêde deyîranê hetê Erzirom, Erzingan, Sêwaz û Meletîye ra hes kerdêne. Pîlanê ma ê deyîrî ezber kerdbî, radyoyî ver de vatêne.
Radyoyê ma akerde bî, yewerî Anatolîyaya Mîyanêne ra bi terzê hewaya girane deyîrî vatêne. Sebrê pîyê mi bî teng, dest berd gojage, vengê ci birna. Maya mi goşî vît kerdî: “To qey girewt, wa bivaco!” Pîyê mi qet goş nêkuwt pira. “To qey girewt, wa bivaco!” vat maya mi, sey ke pustirme bikero ser. Pîyê mi hêrs bî: “Çi bivaco Heqî kena! Sey bize qireno!”
A roce ra ez musaya ke pîyê mi ê deyîran ra xulî beno.
Beno ke hîris serrî ser ra şîyî. Hepisxane de rast ame, ez şîya kursê temburî. Yew xortekê ma yo batmanic zî ameyêne kurs. Xoce ma Kirşehîr rabî. Wexto ke ma are dayene ci, o ancîyayêne bi qirneyêk, tembur cenayêne û deyîrê hetê Kirşehîrî kurnayêne. Cindekî xarrê canê xortekê ma bîyêne. “Wîy, nê çi deyîrê ecêb ê!” vatêne. “Wexto ke no nê deyîran vano, ez bena xêx; ez vana sereyê xo bida dêsan ro, biteqna!”
Û xortek gêrayêne mi ver ro: “Ti Heqî kenê, şo ey rê bivace wa vengê xo bibirno.”
Wexto ke wina cindekî niştêne canê ey ra, pîyê mi ameyêne mi vîr. Mi dîqet kerd ke embazê ma deyîranê Anatolîyaya Mîyanêne ra qet hes nêkenê. Terzê ê deyîran ci rê ecêb yeno.
Mi hepisxaneyê Çewlîgî de radyoyê ocayî yê mehellî goşdarî kerdêne. Kêm bo zî ca dayene deyîranê zazakî. Kurmancî û tirkî ra dore nêameyêne zazakî! Semedê deyîranê zazakî ra mi xo da radyoyî. Radyo tim kîşta berzînê mi ra…
Çewlîg ra ma nêfî bîyî. Verê ma panc embazan da bi andêrê Yozgatî. Yozgat biveşo!..
Radyoyê mi ancî kîştîya berzîne mi ra. Ez kanal bi kanal gêrena, boya Xizirî kes hewayê ma ra nêvano. Ne zazakî ne kurmancî… Tim deyîrê Anatolîyaya Mîyanêne, bîlhesa deyîrê dor û verê Anqara.
Hedura mi nêyena, ez a goşdarî bikera.
Terzê xo xerîb yeno. Tim temburo elektro ziringeno. Rîtmê xo eynî, hewaya xo eynî. Deyîrê xo yewbînan ser ra cîya nêbenê.
Ma vateyê xo!
Zaf tere-ture yê. Seba ke qafîye pê biyero, vateyê bêelaqeyî têdime ra rêz benê. Ne mana ne tam. Sere û qina rêze yewbînan nêgênê.
Mi qeneat ardo ke kam ke nê deyîran goşdarî bikero, sereyê xo beno sey kodikî!
