Ozlem Guntaş

Waxtê jû de pê hewt kowan de, dîyarê de, jû dewa de çeqer û zaf şoraxe bîya. Herra, wela na dewe bêawe, vayê xo serdin, zimistanê xo xedar û xezeb bîyo. Labrê mîyanê na dewe de jû dare bîya. Namê xo since bîya.Na dare zaf kahane bîya. Kesî nêzano ke na dare çend serrî de ra. Tarîx û xafizaya ê welatî bîya.

Na dara since sey vîyale nazliye nêbîya, ca wo ke qe awe çîna û fiqareya, ûja de kok bîya, çê viraşto. Na since zaf sarehûşke bîya. A wela hûşk û şoraxe rê înad sêy koyan xo ser bîya. Wûsar bi wûsar ayê ke çîçeg kerdo ra hênî bowa wes û şîrene vecîya ke î dewîcan înam kerdo ke bowa aye hewnan, merdeyan bîle wûrznena ra. Rozê jû çêneka rindeke û xortê de semtî ra binê şîya na since de ,aşma gulane de, ayê ke ê çîçegê xo yê çeqer û zernênî kerdê ra, a bowa efsanevîye ke dar û ber gûrewto, lêlê sanî de,muxir be de rastê jûbînî bîyê . Lacek jêw raywan bîyo û zaf kowane durî ra amo. Xortekê tîtal bîyo .Çêneke zî sey î welatî, vayê xo asê, rindekîya xo jêy çîçeganê sincike zernen, çimê xo zî girs û sêy deryayan xorî bîyê.

Lacek xeyranê înadê since bîyo. Cero ra çêneke vato: “ Qayît bike; na dare ne verê çem û deryayan de ra, nê zî zaf awe wazena. Koka xo cawo hûşk de bo zî anca wûsar bi wûsarî bowa xû ya şîrene vila kena û şarî mest kena.Eşqê ma zî wa nîya bo. Çiqasî manî, keder û hîlahîye virêndîya ma vecîyo zî, eşqê ma zî sêy na dare xorîn bo, kok bijêro.”

Lacekî, pelganê since ra pela, çîçega ke gina war o, kerda porê ayê ra. Boyê kerda. Çêneke hûya, pêşmirîyaya. Lacêkî ra vato: “O waxt na dare sahadê ma bo. Vawo serdin; pêlanê, na dare deverdo û xezal bo zî; kokê xo ke îtya ro, zerrîya mi zî to de ra, to de manena, nêvecîna.”

Tayê waxt vêreno ra. Jû xebera şîyaye yena lacêkî rê. Gere zaf durî ra şêro. Roja ke cêra benê anca binê a since de benê. Endî zaf serd beno, zimistan zî çêber de, cîran beno. Darê ke sêy vîyale nazliyê rew ra pelgê xo verdê de û rût û repal mendê. Labre pêlê since onca hênî nême ra kewe mendê û bowa xo anca sêy wûsarî, ûsar ra darîya we, ama.

Lacek endî sono ke şêro, girmikê dendikanê sincike dano çêneke. Vano: “To ke ez xo vîr ra kerda nê dendikan berze wele. Ti zana;‘ na dare şoraxîye ra nêtersena. Awe çînebo zî royena. Dare ke bîye kewe, zergûn mi ana,bîya xo vîrî. Çîçeg ke kerd ra zî ez ke kewtî ya bowa sima welatan ser de mi rê yena.”

Lacek endî sono. Satî, rojî, serrî vêrênê ra. Nêzan, dewîjî çend serrî sahîdê since benê. Kam çi zano çend serrî, çend zimistanî,a dare bena hûşk û nêwe ra bena kewe, yena rê can û çîçeg kena ra, bowa xo welatan ser de vaydîna, lacekî rê sona.Û nêzanîme; çêneke zî çend rojî û çend serrî binê, şîya dare de kesrete oncena. Since zî vayê zimistanî yo serdin û xedarî de tayê pelganê xo verdana de, labre sêy hevîya zerrîya çêneke, caranî înad ca nêverdana.

Rocan ra roje, anca jû şewdirê gûlane de, dewe ser o bowa dare, bowa since, axme û vila bena. Çêneke bîya kahal, labre anca ê çimanê xû yê xorîyan ra, bidîyax sona şîya Since . Nîyadana ke jû mordemekî xo ozno darê rê ke porê xo tozin o û destê xû yê delalî kî bîyê qirmiçikin. Yoxro ke o lacek o. Rayan ra, manîyan ra vêrdo ra; lebatê û xîret kerdo, pêyser amo û şîyo şîya sincike de vineto. Seke çêneke dîya, cêro ra ci; ci ra vato: “Vîyalî ke rêştî awe benê kewe. La sincî ke reştî sewda, çîçeg kênê ra. Mi awe rê damîşda, la to rê, çînebîyayenî û hesreta to rê damîşnêda.”

A roce waştî resenê jubînan ya, sincike seke a roce firaz û bimbarek kena. Xafilde bowa xo verdana ra; der û berî rê vila kena. A roce ra têpîya dewîcan kêyî ke bowa sincike gûrewte, vanê: “ Eşqo ke manîyan rê, badîreyan rê vilê çêwt nêkeno, kokê xo zî sêy qirmê xo qeyîm o, pêt o, qedîm o û rastîkeno; bowa î êşqî ya yena. Boya sewda rastîkene yena.”

Pelgê şêminî benê çewt vayî rê

Jêw xatir wastiş wedardîyo gilê since de, dare de

Vîyalî resenê awe

Kesrete qedîna; la

Sincî eke reştî sewda çîçeg kenê ra

Axir ma zî resenîme pê pêynîye de

Şîya since de

Belka axir waxtî de

Sewdayî benê girs,

Eşqê girs û rastîkenî jîl danê

Şîya dare de

Sincî mirenê kesrete ra

Nêmirenê, bêawe ra

Belka waştîyan rê manenê

Dendik û toximê na dare nîya

gil û lizgeyan ra

Şanika ma kî manena

Şîya dare de, meşteyan rêya