Ozlem Guntaş

Odysseus û Penelopeye mîtolojiyê û edebiyatê dîna de eşîqê namdarî yê û zaf rind nas benê. Endî bîyê nîsanê eşqî. Coka wazena kilmek ra qalê hîkayeya înan bikêrîne.

Odysseus qiralê Îthaka yo û zaf biaqil o. Penolepeya rindeke û xirte de zewecîno, jû lacê xo beno. Xafilde ra cengê Trûva vecîno. O mecbûr maneno ke şêro. Cinîye, bi xo eyî kena rast. Cengê Trûva des 10 serrî dewam keno. Ceng ke qedîya vecîno rayê ke şêro çê xo, leyê cinîya xo Penelopeîa û lacê xo. Labrê agerayîsê xo zaf beno derg. Zaf tahlûkeyan ra vêreno ra. Îlah Poseîdon neleran ano sarî ser de. Cinawarû, dêvû û ûsn.de dano pêro. Na rayê û xoverestene des (10) serrî dewam kena. La o qe raya xo û xirret ra nêtexelîno. Boyûna Penelopeyeîa xeyal keno, lebat û cehd keno.

Odysseus ke rayan ra wo Penelopeye zî boyûna eyî pînena. Çike ayê, eyî ra zaf qiymet dîyo û ci ra zaf hes kena. Na mîyanê de zî talîbê Penelopeye ra belka zî se kesî hênî zanê Odysseus merdo û çimê xo zî ayê de ro, na semed ra serayîya Îthaka îşgal kenê. Hem sermayê ci qedenenê, hem zî Penelopeîa rê zorbayîyê kenê. Zor kenê ke salê înan ra jêwî de bizewecîyo.

Penelope merdena mêrdê xo rê qe înam nêkena, zaf qewetîn vindena û planê kena ke wa înan, talîban bixecelno. Vistewrê xo zaf nêweş o, lacê xo ke hal bi halî nîyamo, o zî kewto rê royî ver. Vana; “ez vistewrê xo rê kefen derzena, virazena; keyî ke mi qedena, sima ra jû de zewecîna”. Û nîya înan xecelnena .

Roj ke bî kefenî virazena,derzena; şêwe ke bî dizdîya kena ra, saynenawe ke nêqedîyo û î qarşê ci nêbê. Serran ser nêqedenena. Ferq kenê ke ma xapnena. Nîya, nîya xecelnayîş ra des serrê bînî vêrenê ra.

Vîşt serrî ra têpîya ( 10 ceng, 10 rayê) Odysseus kincanê xo vûrneno, kinc û kolê belengazan keno payî, dizdîya yeno reseno çê, serayîya Îthaka. Paştîya lacê xo û mordemê xo yê ke sadiqê ci yê, bi înan îyê ke ûja îşgal kerdo, talîbanê cinîya xo ûîb. wertê ra dano we.

Dima ra vecîno verê, verba cinîya xo Penelopeye. A verê coyî şik kena û eyî cerebnena. Xizmetkaran ra vana’“cilê ma bîyarê teber.” Odysseus qarîno, vano; “ Sima nêşîkînê o cil bîyarê teber.” Çike jû koka ê cilî wele de ra, giredayîyê koka dara Zeytûnê yo. No sirr zî têyna ê hûrdêmena zanenê. Endî a zana ke o mêrdê xo yo, Odysseus o. Virare fînê jûbînî ra û resenê jubînî .

Ma vînenîme ke; badîreyî, çiqasî girs benê wa bibê, eşqo rastîken, waxtî û durîye maxlûb keno. Penelope vîştî 20 serrî Odysseusî pawena, sebir kena, sadiqê ci manena û nêtexelîna ci ra. Çike o zaf biaqil, qehreman û bibext o. Bizanênê o merdo zî belka anca ayê o pawitenê. Odysseus zî, rayê ra çi tengan ra vêreno ra, çi belayî yenê sarî ser de anca raya xo ca nêverdano, û sono reseno çê xo, cinîya xo .

Penelope û Odysseusî
Ju koka Zeytûnê de viraşta cile
Textê xo, kokê xo
şîyo resto wele
nêrijîyo hata pêynîye
Odysseus şîyo cengê Tûrûvaye
des serrî de qedîyo
dima ra gino ra raye
nêtexelîyo; nafa zî
Posedîonî de, pêlan de do be pore
rayî bîyê qapan û derg, des serre
bisebr pawito Penelope;
Îthaka de, vîştî serrê
sêy çila şêwe
eşqê xo, qe nêqedîyo
seke waxt vineto hende serre
aye kefen desto roj de
peşewe saynowe, gûrewto zalîmî destî ra de
bîya zêde kesreta vîştî serrî çiman de
jû vîrîstê kemî nêbîyo namê Odysseusî ziwan de
Odysseus
postê belengazî de agero şîyo çê
dîya, zerrîya Penolepeya sadiq û xirte
Vato: ”Caranî cilo ke dara zeytîne ra viraşto erjîno teber ke; beno qe?”
zano ke; teberika min a,
nêmêyê rûhê min a na cinîke
virare fîşta pi ra, nêverda ra
pêynîye de restê jubînî
vîştî serrî ra dima, serayîya Îthaka de
cil zî sahad bîyo vûslatê înan rê
amênê qehremanîye û bibextîye bîyo
sitê Odysseusî de
ê xirtîye û sadiqiye bîyo
sitê Penelopeye de
Penelope û Odysseus ke bibê dîna de
erzenê xo ver resenê jubînî pêynîye de