Dêrsim de, cinîyê ke wazenê stresî ra bixelisîyê, atmosferê xozayî yê Gelîyê Munzurî de spor kenê û vanê ke na çalekîye seba înan zaf bi feyde ya.
Cinîyê ke wazenê vera stresê zêdeyî de mucadele bikerê, atmosfera xozayî ya Gelîyê Munzurî de bi sporê nefesî, hereketanê medîtasyonî kenê ke rihet bibê. Vengê awe, hewayo pak û têkilîya bi xozaye hizur dana cinîyan.
Cinîyê ke panc serrî yo ke Dêrsim de xoza de pîlates kenê, îfade kenê ke na çalekîye hem seba înan hem zî seba domananê înan zaf weş a.
"Cinîyî siba ra heta şanî keye de ronişte yê"
Musnayoxa Pîlatesî Çîlek Karakaya amancê çalekîye wina ard ziwan:
"Cinîyî siba ra heta şanî keye de ronişte yê. Dima ra mecbûr manenê ke şêrê hetê doxtorî. Doxtorî vanê 'bigêrê, spor bikerê' la cinîyê ma na babete de nezan î. Ewro ma ameyî verê Munzurî; ma destê xo hetê Munzur Babayî ser akerdî û ma va, 'Na nêweşîye ma ra dûrî bike, weşîye bide ma.'"
"Xozaya ma zî weş a, ma zî rînd î"
Nesrîn Aktaşe zî hîsê xo wina ardî ziwan: "Ewro reya pancine bîye ke ma na xoza de pîlates kerd. Zaf weş bi, hewa zî ewro zaf weş bi. Xozaya ma zî weş a, ma zî rînd î. Spor hem seba bedenê ma hem zî seba zihnê ma zaf weş o."
Nuray Ere ya ke nêweşa MSyî ya, îfade kerd ke pîlates aye rê weş yeno û wina dewam kerd: "Bi vengê awe û vengê xoza reyde hîna weş bi. Pîlates hem hetê psîkolojî ra hem zî hetê fîzîkî ra mi rê zaf weş yeno."
Oyku Toprake ya ke tewrê çalekîye bîye, wina va: "Ez ewro ameya ke pîlates bikera. Eke ez keye de bîyêne, mi do bi tablet yan zî telefonî wextê xo vîyarnayêne. Bi ameyîşê tîya, mi seba weşîya xo çîyêko weş kerd."
Çime: Rûdaw
