Çar rojîyo ke adir kewto daristananê Koyê Cûdî. Koyê Cûdî herêma Şirnexî de ca gênê û hetê daran û zergunî ra cayêko muhîm o herême de.
Goreyo ke sîyasetmedarî û sazîyê sîvîlî ê a herême vanê; eskerî bi qestî adir eşto daristanan û a roje ra nata zî vêşayîşê daristanan temaşe kenê.
Serekê Baroya Şirnexî Rojhat Dilsiz zî vano, “Her çiqas vanê, semedê asayîşî şewat vejyayo zî ma gore rîyê rantî ra no şewat amo vetiş.”
Heto bîn ra eskeranê artêşa Tirkiya ê a herême zî yew video ant û video de asîyeno ke eskerî pê vejyayîşê şewatî keyfweş benê.
Serekê Baroya Şirnexî vano, 2 serrî verê cû têdima bi bahaneyê asayîşî darê na herême ameyê birnayîş û vêşnayîş. Wazenê tîya de daristanan çîne bikê û şîrketanê xo bîyarê tîya.”
Heto bîn ra aşkereyo ke semedê hewnakerdişê adirî zî çîke nêno kerdene. Eskerî zî nêverdenê wa şarê ucayî şêro adir hewna bikero.
Parlamentera YSPyî Nevroz Uysal Aslan zî vana, “Semedo ke adir herêma eskerîye ya qedexekerdeyî de vejyayo şar nêeşkeno şêro cayê şewatî û şewatî rê mudaxele biko.”
Zazakî News
