ZAZAKÎ NEWS - Dêrsim de kelecanê şampîyonîya raftîngî dewam keno. Musabeqayê Kûpaya Super a Şampîyonîya Raftîngî ya Tirkiya emserDêrsim de yenê viraştene.
Seba şampîyonîye, Laçê Mûnzûrî ser o parkurê xusûsîyî ameyî viraştene. Musabeqayê ke hetê Federasyonê Kanoyî ra Laçê Mûnzûrî ser o yenê organîzekerdene, bi beşdarîya 300 sporkaran ê 9 wîlayetan ra, di rojî yo ke yenê viraştene. Tîmo ke ser bikewo, do beşdarê Şampîyonîya Ewropa bibo.
“Ez wazena Ewropa de Amed temsîl bikerî”
Sporkar Emrullah Gungor o ke Amed ra ameyo, îfade kerd ke armancê înan beşdarbîyayîşê musabeqaya Ewropa yo û va: “Ez Amed ra ya. Ewro Şampîyonîya Tirkiya seba weçînayîşanê Ewropa virazîyena. Armancê mi o yo ke ez yew serkewtiş bifînî dest, Ewropa de wîlayetê xo temsîl bikerî û keyeyê xo kêfweş bikerî.”
“Hêvî kena ke musabeqayêko weş bo”
Sporkar Şara Akbayin da zanayene ke ê do dima ke na musabeqa bîye, xo seba Ewropa amade bikerê û va:
“Ma sey tîma sporkaranê xozaye ya Ataşehîrî, Stenbol ra ameyî. Ez bi eslê xo Dêrsim ra ya û kêfweş a ke ameya welatê xo. Bi musabeqayanê Kûpaya Tirkiya ya Raftîngî sporkarî do bêrê weçînitene û ma do beşdarê Şampîyonîya Ewropa ya ke wîlayetê Rîze de virazîyena, bibî. Hêvî kena ke musabeqayêko weş bo.”
