ZAZAKÎ NEWS – Çimeyê Munzûr Babayî yo ke hem yew cayo turîstîk o hem zî hetê Elewîyan ra sey yew cayo bimbarek yeno qebulkerdene de mescîdêk ame viraştiş.
Xeylê şarê Dêrsimî bi rayberîya Komela Kulturî ya Pîr Sultan Abdalî, Komela Elewîyan a Demokratîke û Federasyonê Komelanê Dêrsimî verê mescîdî de ame pêser û viraştişê mescîde protesto kerd.
Komelan pankarto ke ser o “Munzir Zîyara ma ya Bimbareke o” û “Munzir bêwayîr nîyo” nuştebî, kerdî berz.
Cemato Elewî vano ke, peyê viraştişê nê mescîdî de armancê nimiteyî est ê û no mescîd bê ke cemato Elewî reyde bêro qiseykerdene, ameyo viraştene.
“Munzir seba ma tena awe nîya ke herikîyena”
Hemsereka Komela Elewîyan a Demokratîke Kadriye Dogane razînêbîyayîşê xo wina ard ziwan:
“Munzir seba ma tenya awe nîya ke herikîyena, o yew sirro kehen o ke heq û can tede resenê pê.
Çimeyê ey bi gulbangê xeylê derwêşan, bi nefesê xeylê pîran, bi nîyazê xeylê mayan ameyo wendene û seba şarê ma cayo tewr bimbarek o.
Her dilopa ci loqme ya, her herikîyayîşê ci semah o, her kemerê ci nîyaz o. La înan ke çimê zerrîya înan kor o, nê heqîqetî nêzanenê.
No kar, ke bê rizaya ma û bê hurmetê vera bawerîya ma yeno kerdene, yew perdeyo newe yê o hiş o ke bawerîya Elewîtîye çin hesibneno û wazeno ma mîyanê mîyanê tekperestîya îdeolojîya fermî de mehkûm bikero.”
