ZAZAKÎ NEWS - Komela Rojnamegeran a Dîcle Firatî (DFG) û Komela Rojnamegeranê Cinîyan a Mezopotamya (MKG), seba 6 rojnamegeranê ke ewro Nisebîn de ameyê tepiştiş, eşkerayî da û destbendkerdişê rojnamegeran şermezar kerd. Eşkerayîye verê bînaya Partîya DEMî ya Nisebînî de amey dayene.
Endamê DFG û MKGyî, parlamenterê Partîya DEMî, rayberê DBP û Partîya DEMî, aktîvîstê TJAyî û xeylê welatîyî tewrê eşkerayîye bîyî.
Ewilî rayberê DFGyî rojnameger Bîlal Guldemî qisey kerd û bale ante serê hedîseyanê Rojawanê Kurdîstanî û reaksîyonê şarê Vakurê Kurdîstanî yê vera hêrişanê Rojawanî. Guldemî da zanayene ke ewro Nisebîn de seba wayîrvejîyayîşê Rojawanî rayraşîyayîşêko demokratîk ame viraştene û dima ra polîsan hêrişê kome û rojnamegeran kerdo. Guldemî ard ziwan ke destbendkerdişê rojnamegeran nêno qebulkerdene.
‘Ma do her tim karê xo ser o bibê’
Dima ra endama Basin-Îşî rojnamegere Şîrîn Bayike qisey kerd û îzah kerd ke bi rojan o Rojawan de xoverdayîşêk esto û rojnamegerî zî wazenê nê bîyayîşan teqîb bikerê. Bayike da zanayene ke ê do her tim karê xo ser o bê û waşt ke rojnamegerê ke ameyê destbendkerdene lez bêrê veradayene.
‘Şima nêeşkenê vengê raştîye bibirnê’
Peynîye de zî Parlamentera Partîya DEMî Salîha Aydenîze qisey kerd û destbendkerdişê rojnamegeran û welatîyan şermezar kerd.
