ZAZAKÎ NEWS– “Festîvala Tebîet, Kultur û Bawerîye” ya ke hetê Komela Paştîdayîşî ya Cem û Kulturê Dewa Görgüyî (Qûrçikî), Federasyonê Elewîyan ê Tirkîya (ADFE) û Konfederasyonê Yewîyanê Elewîyan ê Ewropa (AABF) ra dewa Qûrçikî ya qezaya Gimgimî (Varto) ya Mûşî de ameye organîzekerdene, roja xo ya hîrêyîne de qedîyaye. Roja peyêne ya festîvale de, Gola Keskî (Gola Hemirpetî) ke seba Elewîyan bimbarek a, ameye zîyaretkerdene.
Koma ke verê Cemxaneyê Qûrçikî de amey pêser, tîya ra hetanî Gola Keskî kewt rayîr. Kesê ke amey kenarê gole, uca de bi dewul û zirna wextêko derg govend girewte. Govendan ra dima eşkerayîyêk amey dayene.
Tîya de Serekê Pêroyî yê Federasyonê Elewî Bektaşîyan (ABF) Mustafa Aslanî qisey kerd û bal ant muhîmîya festîvale ser û wina va: Her çî ra ver ma sey Elewî, gerek tebîetê xo, dormeyê xo pak bigîrê û wayîr bivejîyê. Ewro Gola Hemirpetî yanî ziwanê ma de Gola Keskî seba ma tena gole nîya, yew bimbarekîya ci esta. Koyan, kemeran, mîr û mûjan yew bimbarekîya ci esta. Coka, yew demo ke Tirkîya de tebîet yeno qetilkerdene, daristanî yenê veşnayene û her çar hetê ma bîyê sey cayê herbî de, wayîrvejîyayîşê bawerîya ma, tebîetê ma û ziwanê ma zaf ercîyaye û qîmetîn o.”
Eşkerayî ra dima, kame newe ra bi dewull-zirna govend girewte. Govenda ke wextêko derg ame girewtene ra dima, festîvale qedîyaye.
