Komîserê Polîsî yê Eyaletê New South Walesî yê Awustralya Mal Lanyonî, kombîyayîşê çapemenîye de ke bi Serewezîrê Awustralya Anthony Albaneseî dir viraşt, derheqê hêrişê vera fîrazkerdişê Roşanê Hanukayî yê Plajê Bondîyî de eşkerayî da.
Hêrişkerî pî û laj vejîyayî
Lanyonî îfade kerd ke cigêrayîşê tesbîtkerdişê nasnameyî temam bîyê. Lanyonî da zanayîş ke hêrişkerî pîyêko 50 serre û lajê ey o 24 serre yê û lajo 24 serre nêweşxane de binê tedawî de yo û rewşa ey krîtîk a, pî zî merdo. Lanyonî va ke pîyo 50 serre wayîrê çekanê bi ruhsat bi, 6 çekê ey ê bi ruhsat estbîy û cayê hedîseyî de zî 6 çekî ameyê vînayîş.
"Çîyo ke ma dî antîsemîtîzm û terorîzm bi"
Serewezîr Albaneseî zî eşkerayîya xo de va, "Çîyo ke ma vizêr dî, xirabîya xalîs, antîsemîtîzm û çalakîyêka terorîzmî bî." Albaneseî, cewabê rexneyanê Serewezîrê Îsraîlî Benyamîn Netanyahuyî yê ke hukmatê Awustralya mesul tepîştbî, wina da: "Nika wextê yewbîyayîşî yo."
Hêrişê biçek yê Awustralya
Awustralya, Sîdney de Plajê Bondîyî de vera fîrazkerdişê Roşanê Hanukayî hêrişêko biçek amebî kerdiş. Amebî eşkerakerdiş ke şikdaran ra yew merdo û şikdaro bîn o birîndar zî ameyo tepiştiş.
Serewezîrê Awustralya Albaneseî, kombîyayîşê çapemenîye de yo ke viraştbî, vatbî ke hêriş vera Awustralyayijanê Cihûyan ameyo kerdene. Temsîlkaranê cimatê Misilmanan ê Awustralya hêriş şermezar kerdbî û paştîdayîşê xo seba mexdûran îfade kerdbî.
