ÎSÎGî beyan kerd ke, wextê îqtîdarê AK Partîyî de 888 gedeyê karkerî merdê.
Meclîsê Asayîşê Karî û Weşîya Karkeran (ÎSÎG) bi wesîleya Roja Têkoşînê Vera Karkerîya Gedeyan a 12ê Hezîrane karkeranê gedeyan ser o raporêk eşkera kerd.
Rapor de vajîyeno ke wextê îqtîdarê AK Partiyî de 888 gedeyê karkerî merdê. Rapor de ame parekerdiş ke gedeyî herinda ke parkanê kaykerdişî û dibistanan de wextê xo bivîyarnê bêçareyî ra û bi mecbûrî şuxulyenê.
ÎSÎGî pare kerd ke Tirkîya de hûmarêka zêde gedeyî xebitîyenî û dewlete na mesela de wazîfeyê xo nêana ca û waşt wa vera karkerîya gedeyan tedbîrî bêrê girewtiş.
Heto bîn ra Baroya Amedî zî wesîleyê na roje ra beyanatêk da û aşkere kerd ke, Tirkîya de 2 mîlyon gedeyî şuxulîyêne, nika 4 mîlyon gedeyî estê ke karanê cîya bi cîyayan ê giranan de şuxulîyenê û nê gedeyî bînê tehlukeyî de yê.
