Qezaya Kanîreşî ya Çewlîgî de dormeyê çend dewan de newe ra plan beno ke Daristanê Karacehennemî de darî bêrê birnayene. A mintiqa verê cû operasyonanê eskerîyan de seba dewican ameybî qefilnayene û tede darî ameybî birnayene; na rey zî bi nameyê "newekerdişî" reyna birnayîşê daran yeno kerdene. Dewicî zî vera ney ameyî têhet.
Eşkerakerdişo ke dewa Kızılağaçî de ame dayene, Çewlîg, Qarliova, Gimgim û dewê dormeyî ra xeylêk kesî tewrê ci bîy.
'Wa tebîetê ma peşkêşê sermaye nêbo'
Verê eşkerayîye perwerdekar Mürsel Bekî qisey kerd û va: "Wa darê ma, wareyê ma, xozaya ma talan nêbê."
Bekî ard ziwan ke sermayedarî wazenê heqê xebitnayîşê daristanan bivisnê destê xo û wina dewam kerd: "Tebîeto ke sey yew perçeyê cenetî yo wazenê bivisnê binê kontrolê xo, lêşin bikê. Binê sîya pereyanê xo de senî ke biwazê wina bixebitnê. Ma ney qebûl nêkenê. Ma seba ke naye rê vajê 'vinde' tîya de yê."
