Akademîsyen İbrahim Bingöl o ke xeylê wext esto ke Universîteya Artukluyî de ziwanê Kurdî ser o xebatan keno û kitaban nuseno yewna cigêrayîşê xo kerdo kitab û çap kerdo.
İbrahim Bingölî bi Kurdîya Kurmanckî û bi nameyê "Zazakî û Kurmancî Ji Aliyê Felsefeya Zimanî ve" kitabêk hedre kerdo û kitab Weşanxaneyê Avesta ra ameyo çapkerdiş.
Bingölî nê kitabê xo de hetê felsefeya ziwanî ra Zazakî û Kurmanckî dayê têver û derheqê her di lehçeyan de zanayîşan dano.
İbrahim Bingöl cayêkê Kitabê xo de wîna vano: " Çi heyf ke zazakî ewro ver bi merdişî şina. Eke mûcîzeyêk nêbo nika ra tepîya xelisyayîşê zazakî zehmet o. Rasta ci xelisyayîşê ziwanêk tena bi xîret û çalakiyanê roşnvîran, zanzayeyan û cigêrayoxan zehmet o. Zaf faktorê bînî yê teberê ziwanî de zî lazim ê. Asîyeno ke zazayî wayîrê nê faktoran nîyê. La onca zî çi destê ma ra bêroo ma do semedê zazakî bikê. Mi waşt ez na xebate de kurmancî û zazakî hetê felsefeya ziwanî ra bidî têver û nîşan bidî ke ka hetê mintiqa ra mabênê nê lehçeyan de çi ferq û seypeyî esta.
