Qezaya Qoserî ya Mêrdînî de, dadî, babî û tuta înan a 5 serre keyeyê xo de merde ameyî dîyene. Ame tesbîtkerdene ke her hîrê kesî zî bi çekan ameyî kiştene.
Goreyê melumatî, cîrananê keyeyê ke Taxa Turgut Ozalî de ciwîyayêne, dima ke demêk keyeyî ra xeber nêgirewte, vizêr şan muxtarê taxe reyde berê keyeyî kerd a û kewtî zere.
Muxtar û cîranan dî ke Mehmet K. (37), cinîya ey Berna K. (33) û keynaya înan a 5 serre Samyelî K. sereyê xo ra gule werdê û erd de yê.
Cigêrayîş ame destpêkerdene
Serebût cade rayedaran rê ame vatene. Girewtişê xebere ser o ekîbê weşîye, polîs û îtfaye şîy cayê hedîseyî.
Kontrolê ekîbanê weşîye de ame tesbîtkerdene ke dadî, babî û qije merdê.
Cenazeyê înan seba otopsî neqlê morxê Nêweşxaneyê Perwerde û Cigêrayîşî yê Mêrdînî bîyî. Derheqê hedîseyî de cigêrayîş ame destpêkerdene.