Badê xebata derg a bi desan welatperestanê Kurdan, mezelê hunermende Leyla Bedirxane paytext Fransa Parîs de vîndîbîyayîşî ra xelesîya
Muhdetê mezelê Leyla Bedirxane heta serra 2054ine ame dergkerdiş. Eke wextê mezelê Leyla Bedirxane nêamêne dergkerdiş do mezelê aye giristanê "bêkesan" de biamêne definkerdiş.
Nuştoxê Kurdî Ahmet Kardam û Osman Aydinî bi beyanatêko muştereke îlan kerd ke mezelê hunermenda namdar Leyla Bedirxane keyna Ebdulrezaq Bedirxanî, badê hewldayîşêk, wexte vîndîbîyayîşî ra ameyo xelesîyayene û wextê pawitişê ey 30 serrê bînî ame dergkerdiş.
Beyanat de ame îlankerdiş ke demek verî bi ardimê zaf welatperestanê Kurdan, mezelê Leyla Bedirxane Girsitanê Saint-Cloudî yê Parîsî de ameyo vînayîş.
Badê cû ame zanayîş ke wextê mezelê Leyla Bedirxane û mêrdeyê aye Henri Touache 22ê Temuza 2024ine de qedîyeno.
Seba newekerdişê qeydê mezelî, lazim bi ke merdimêk keyeyî ra muracat bikero.
Ame vatiş ke, warzaya Leyla Bedirxane Herman Pinkasfeldî muracat kerda û mezel ameyo pawitene.
Xebatê ercayê yê welatperestanê Kurdan
Dewamê beyanatî de îşaret bi ke xebata muştere ya çend welatperestanê Kurdan ame kerdiş û wina ame vatene:
"Mezelê Leyla Bedirxane bi ardimê Pascal Boran, Mucahît Ozden Hûn, Behîce Ferîde Demîr, Leyla (Safiye) Ataç, Rohat Alakom, Saadet Irmak, Fatma Toksoy û Cihan Bazencirî ame vînayîş.
Bi ardim û hewldayîşê şexsîyetanê sey Leyla (Safiye) Ataç, nuştoxê kitabê "Prensesa Kurd a Dansê Leila Bedirxan", Ramazan Yildiz û bi rayberîya Hesen Çakir, nuşteyê ke mezel ser o yê ameyê newekerdene û tamîrê ke lazim bî ameyê kerdene.
Leyla Bedirxan kam a?
Leyla Bedirxan (1908-1986) yew hunermendanê tewr namdaran a Kurdan ra ya.
A sey hunermenda dans û baleyî ya namdar û ronayoxa dansa moderne ya netewî ya Kurdî yena şinasnayene.
Keyna Ebdulrezaq Bedirxanî, endama keyeyê Bedirxanîyan a. A serra 1974ine Goristanê Saint-Cloudî yê Parîsî de ameya defnkerdene.
Leyla Bedirxane hem bi huner û hem zî bi têkoşîna xo ya seba nasandişê kulturê Kurdî yê neteweyî, dinya de cayêko muhîm û tarîxê şarê Kurdî de gêna.