Mehmed Olmez
Welatê Mardînî de
Mîyanê dewa Cilînî de
Pisîngêka xurt û şeng’
Bîybî wayîrê nam û veng
Merreyî nêverdayî keyeyan ra
Ê nêvejîyayî qul û çalan ra
Eke vengê înan ameyêne teber
Pisînge xo hema eştêne ser
Înan ra yew mat û gêjek
Merreyo sîya û boçderg
Va:goş bidê mi gele embazan
Ma ase mendî mîyanê çalan
Yan gere ma çareser bikê
Yan zî ganî tîya ra bar bikê
Merreyî bînî zî kom bîyî
Seba na mesela do qisey bikî
Her yewî çîyêk vatêne
Tim pîze xo veşnayêne
Înan ra yewo rîsipî
Va: ha yo mi rayîrêk dî.
Di hebî zingilan bivînê
Bidê yewî û bierşawê
Eke cayêk de pisînge dîye
Wa lez dekero vîyeyê aye
Wexto ke ame vengê zengilî
Ma zî do o wext biremê.
Ma do xo cayêk de binimnê
Wina bo ma do qet nêmirê
Hemînan va, no fikrêko baş o
No planê merreyan o.
