Mihemed Kurdî
Roja 26ê aşma Nîsane 2025î de Rojavayê Kurdistanî, bajarê Qamişlo de Konferansê "Helwêstê Hempar û Yewîya Kurdîstanî" virazîyayo. Konferans bi arizî semedê siberoja Kurdanê ma yê Rojavayê Kurdistanî ameyo sazkerdiş.
Rojava, Ewropa, Tirkîya, Sûrîye, Başûrê Kurdistanî ra vêşêrî 400 delegeyî beşdarê konferansê neteweyî yê Kurdan Qamişlo de bîyê. Konferans de temsilkarê heme partîyanê Kurdan ê sîyasîyan ê sey PDK, YNK, ENKS, PYD, DEM Partî amade bîyê. Winî zî serfermandarê pêroyî yê HSDyî birêz Mazlûm Ebdî û alimê namdar Dr. Şêx Mûrşîd Xeznewî zî konferans de amade bîyê. Înan ra vêşêr zaf komeleyan ra şexsîyetê avzêlî, cigêrayoxî, roşnvîrî, nuştoxî û hunermendî zî beşdarê konferansî bîyê.
Konferans bi sirûda "Ey Reqîb" dest pêkerd, verê cû komîteya amadekar xêrameyîşê mêmanan kerd û dima qiseykerdoxan qisey kerdî û mesajê serek û rayberan ameyê wendiş. Mîyanê qiseykerdoxan de serfermandarê pêroyî yê HSDyî Mazlûm Ebdî zî est bi, Ebdî qiseyê xo de va ke: "13 hezar keyna û lajê ma şehîd kewtê, nêzdîyê 30 hezar embazê ma zî birîndar bîyê, ez birîndaran rê şîfa wazena, ma nê konferansî xelatê şehîdanê ma kenê."
Konferansî de zaf birrê muhîmî yê sey fermîbîyayîşê ziwanê Kurdkî û pawitişê statuyê Kurdan ê mevcûdî, ameyê girewtiş. Konferans ra dima hetê Kurdî yê ke beşdarê konferansî bîyê razîbîyayîşê xo vatê. Medyaya cîhanî zî konferansî rê eleqeyêko pîl nîşan dayo, bi desan rojnamegerî û dezgeyî weyra de amade bîyê û konferans nêzdî ra teqîb kerdê.
Hêvîya Seserran
Ma Kurdî xeylê wextî zilma dagirkerdoxan ver bêçare mendê û dejê birînanê xo ver bermayê. La na rey gama ke ma dî Konferansê Helwêstê Hempar û Yewîya Kurdîstanî bi sirûda "Ey Reqîb" dest pêkerd, ma keyfan ver bermayê. Raşta ci dîmenê yewîya hetanê Kurdan ê konferansê Qamişlo de zerrîya heme Kurdan weş kerdê, hêvîyê ma xurt kerdê û bêguman do rayîrê ma zî roşn bikerê.
Konferans ra dima reyna dost û dişmenê ma Kurdan bêlî bîyê. Bi sebebê ke ma û dostê ma keyfeweş bîyê, tay het û welatî zî bi Konferansê Helwêstê Hempar û Yewîya Kurdîstanî cigiryayê. Badê Konferansî serekê HTŞyî Ahmed Şara û temsilkarê dewleta Tirkîya nêrazîbîyayîşê xo nîşan dayê û vatê, birrê ke konferans de ameyê dayîş ma qebûl nêkenê. Wina aseno ke dîmen û mesajê ke konferans de ameyê dayîş çimê dagirkerdoxan tersnayê, çimkî înan zî baş zanenê yewîya Kurdan azadbîyayîşê Kurdistanî yo, coka înan reaksîyon nîşanê konferansî dayê.
Ma Kurdî bi seserranê ke bêtifaqîye ver her çî ra bêpar mendê û her tewir tertele û qirkerdiş/komkuştişê pîlî ra rû-bi-rû mendê. Şarê ma yê belengaz nê nêweşîye (bêtifaqîye) ver hertim nalenê û gerrê kenê, çimkî şar baş zaneno ke xelasîya Kurdistanî tifaqa Kurdan de ya. Coka zî bi seserran o ke hewnê ma yo tewr pîl tifaqa Kurdan a hundirêne ya. Şukrê Homayî rê, hewnê ma Rojavayê Kurdistanî de ca bi ca bîyo.
Tifaqa Kurdan hewnê Ehmedê Xanî bî, ma sipasîya ê kesan kenê yê ke nê hewnê ma bi ca ardî. Rojavayê Kurdistanî semedê heme Kurdan bîyo hêvîyêk, na rey hêvî û waştişê ma no yo ke yewîya ke nê konferansî (Konferansê Helwêstê Hempar û Yewîya Kurdîstanî) semedê yewîya heme leteyê Kurdistanî bibo bingeyêko xurt û bibo wesîleya serkewtişî.
