ZAZAKÎ NEWS - Qeyûmê Şaredarîya Bajarê Pîlî ya Wanî, 223 karkerî bi behaneya 'Tehqîqatê ewleyîye' karî ra vetî. Mabênê karkeranê ke ameyî vetene de 7 kesî astengdar ê. Karkerê ke karî ra ameyî vetene, her roje çalakîyan virazenê û vera nê qerarî vejîyenê.
Goreyê xebera Ajansê Mezopotamya (MA), Veysel Yalçin û Ramazan Oner, ke raporê înan o astengdarîye esto, vera nê qerarî hêrsê xo mojna. Astengdaran waşt ke mexdûrîyeta înan a ke reya dîyine ya hetê qeyûmî ra virazîyena, bêro çareserkerdene.
Astengdar Yalçin: Ez karê xo wazena
Veysel Yalçinî îzah kerd ke o 11 serrî yo şaredarîye de xebitîyeno û va:
“Cinîya mi wefat kerd, ez ewnîyena 5 domanan ra. Ez debara xo bi meaşê şaredarîye kena. Na reya dîyine ya ke ez hetê qeyûmî ra karî ra yena vetene. Wexto ke Bekîr Kaya serek bi, ez kewta kar, qeyûmo verên zî ez karî ra vetbîya. Neslîhan Şedal û Abdullah Zeydanî ez newe ra girewta kar. 6 mengan ra dima, qeyûmî reyna ez kar ra veta. Ez karê xo wazena.”
Ramazan Onerî dîyar kerd ke ê mexdûr bîyê û nê çîyî vatî: “Ez bi hawayêko huqûqî kontenjanê astengdaran ra kewta kar. Rewşêka bêhuqûqîye çin a. Na rewşe ra ez zaf mexdûr bîya.”
Onerî da zanayene ke karkerê şaredarîye bi destê qeyûmî mexdûr benê û va, “Ez hetê psîkolojîk û hîsî ra zaf rincan bîya. Rewşe nika xirab a û ma wazenî ke na mexdûrîyeta ma cade biqedîyo.
