ZAZAKÎ NEWS – Serekê Pêroyî yê MHPyî Devlet Bahçelîyî rojnameyê Sabahî rê qisey kerd û behsê bîyayîşanê peyênan ê Tirkîya kerd. Bahçelîyî eşkera kerd ke ganî Şaredarê Esenyurtî Ahmet Ozer zî bêro veradayîş û va ke, muhakemeyê şaredarîyanê CHPyî ganî teşrîna peyêne de biqedîyo.
“Ganî Ahmet Turk ageyro wezîfeyê xo ser”
Devlet Bahçelîyî persa “Çarçeweya xebatanê ‘Tirkîyaya Bêteror’ de sererastkerdişê qanûnî do senî bê?” ser o, bal ant rewşa Ahmet Turkî û Şaredarê Esenyurtî Ahmet Ozerî yo ke tepişte yo ser û wina va:
“Nika ma resayê qonaxo ke ma vajê hewceyîyê pîyacuyayîşî çî yê. Komîsyono ke parlamentoye de yo, xebata xo bi hawayêko bitesîr domneno.
Ahmet Turk, Şaredarê Mêrdînî bi la wezîfeyê xo ra ame dûrîfîstiş. O, kesanê ke seba aştîye xebatî kerdî ra yew o.
Vera rewşa winasî de, ganî Ahmet Turk ageyro wezîfeyê xo ser. No do seba averşîyayîşê hîsê birayîye û aştîye gamêka hewle bo.
Ahmet Ozer zî wina yo. Eke Tirkîya dest bi prosesê aaştîye kerdo, ganî Ahmet Ozer bêro veradayîş.
“Gerek pêro unsurê PKKyî goş bidê Ocalanî”
Bahçelîyî bîyayîşanê Sûrîye û tesîrê înan ê prosesî ser o zî vindert û va ke gerek pêro hêzê ke besteyê PKKyî yê, goreyê bira Ocalanî têbigêrê. Serekê Pêroyî yê MHPyî bal ant ser o ke gerek pêro grûbê ke besteyê PKKyî yê, vatişanê Ocalanî goşdarî bikerê û va:
“Ronayoxê PKKyî Ocalanî, 27ê Sibate de eşkerayîyêke da. Ey xo bi hawayêko zaf zelal komelî rê û PKK rê îfade kerd û peyê qiseyê xo de vindert. PKK ame fesixkerdiş û çekî ameyî veradayîş.
Coka, PKK û êyê ke besteyê ci yê, ça de benê wa bibê, mecbur ê ke fermanê Ocalanî bîyarê ca, hurmet bidê ey û goreyê telîmatanê ey têbigêrê.
