ZAZAKÎ NEWS - Dewaya ke seba îptalê Kongreyanê Îstîsnayeyan ê 38. û 21. yê CHPyî amebî akerdiş, Mehkemeya Huqûqî ya Aslîye ya 42. ya Enqere de amey vînayîş. Dewa amey taloqkerdiş.
Avûqatê CHPyî Çağlar Çağlayan û Mehmet Can Keysan û avûqatê delegeyanê kongreyî Onur Yusuf Üregenî mehkema de pawitiş kerd.
Verê dewa, temsîlkarê partîya CHPyî û kesê ke waştêne dewa teqîb bikerê, verê mehkeme de ameyî yewca. Ekîbanê emnîyetî verê mehkeme de tedbîrê asayîşî girewtî.
Ame waştiş wa bêro taloqkerdiş
Avûqatê mudaxîlî Uğur Poyraz, bi bahaneya ke salona mehkeme qij a, waşt ke dewa usul ra bêro redkerdiş yan zî seba ke yew salonêka hîrayêr de bêra vînayîş, bêra taloqkerdiş. Hekîmî waştişî qebûl nêkerdî û dest bi dewa kerd.
Goreyê xebera ke Halk TVyî, nameyanê ke dewa akerda ra Lutfu Savaş û Serekê Pêroyî yo verên Kemal Kiliçdaroğlu, o ke yeno îdîakerdiş ke do qerarê betalbîyayîşê mutleqî de sey qeyûm bêro tayînkerdîş, nêameyî salona mehkeme.
Taloqê 24ê Teşrîna Verêne bi
Dewa taloqê 24ê Teşrîna Verêne bi.
Çi bibi?
Derheqê Kongreya 38. ya CHPyî ya ke 4-5ê Teşrîna Peyêne ya 2023î de amebî viraştiş, hetê Serekdozgerîya Komare ya Anqara ra tehqîqatê bêusulîye ameybî destpêkerdiş.
Serekê Beledîyaya Hatayî yo verên Lutfu Savaşî û tayê delegeyan, seba îptalê kongreya CHPyî ya tarîxanê 4-5ê Teşrîna Peyêne ya 2023î, mehkeme rê dewayî akerdbîyî.
