Xarpêt de, dewijanê Kelxasî vera xebatanê sondajî yê şîrketanê mermer û kromî hêrsê xo mojna. Dewijan va, "Çimeyê awa ma binê tehlukeyî de yê, ma nêwazenê xozaya ma pê nê xebatan bêro qirkerdiş."
Serranê dergan ra nata dormeleyê Kelxasî de şîrketê mermer û kromî xebate kenê û zaf zirar danê xoza. Goreyê melumatê ke dewijan dayê, şîrketan nika zî waşto ke nêzdîyê çimeyê awe yê dewe de "sondajê madenî" bikerê.
Dewijî amey têhet
Vera nê teşebusê şîrketî, dewijê Kelxasî amey têkişt û hêrsê xo nîşan da. Dewijan da zanayîş ke fealîyetê madenî zirarêko pîl dano erdanê înan û çimeyanê awe.
"Ma destûr nêdanê"
Yew dewijî ke derheqê babete de Zazakî Newsî rê qisey kerd, wina va: "Dormeyê dewa ma de mermer û krom vejîyeno û no zaf zirar dano ma. Hem tebîetê ma hem zî weşîya ma zirar vînenê. Nika zî wazenê ke nêzdîyê awa dewe de sondaj bikerê. Kenê ke awa ma zî biherimnê. Ma sey dewijan amey yewca, ma kom bîy û ma destûr nêdanê înan. Ma nêwazenê erdanê xo ser o na xirabîye bêro kerdiş. Wa şarê ma û çapemenî na babete ser o hîşyar bê."
Dewijî wazenê ke wa şîrketi fek nê xebatanê xo ra veradê û xozaya înan bêra pawitiş.
ZAZAKÎ NEWS
