ZAZAKÎ NEWS - Meclîsê Pawitiş û Weşîya Karkeran (ÎSÎG) raporê xo yê aşma Hezîrane eşkere kerd. Goreyê raporî, aşma Hezîrane de tewr tay 164 karkerî wexto ke gurîyayêne, wefat kerdê. Mîyanê nê kesan de 4 tutî, 15 cinîyî û 5 karkerê koçberî zî estbîyî.
Bîlançoya 6 aşman: 961 mergî
Goreyê raporî, 6 aşmanê verênan ê serra 2025î de hûmara karkerê ke kar ser o merdê, resaya 961 kesan. Hûmarî goreyê aşman wina yê: Çele (180), Sibate (124), Adare (159), Nîsane (156) û Gulane (178).
Sektorê tewr talûkeyinî
Aşma Hezîrane de, mergê karkeran goreyê sektoran wina pare bîyê:
- Sanayî: 47 karkerî
- Înşaat: 40 karkerî
- Xizmetguzarî: 39 karkerî
- Zîret: 38 karkerî
Mergê karkeran tewr zaf sektoranê sey înşaatî, zîretî, neqlîyatî, bazirganî/ofîs/perwerde/sînema, şaredarî/karê pêroyî, metal, maden û enerjîye de virazîyayê.
4 kesê ke na aşme de merdî, tutê karkerî bîyî. 3 tutî sektorê zîretî de, yew zî sektorê metalî de gurîyayêne.
- Na aşme de 15 cinîyî û 5 karkerê koçberî ganê xo day. 4 karkeranê koçberan ê Sûrîyeyij, yew zî Efganîstanij bi.
Tenya %1,82yê karkerî endamê sendîka bîyî
Malumatanê tewr balkêşan ê raporî ra yew zî no bi ke; tenya 3 karkerê ke merdî (%1,82) endamê sendîka bîyî. 161 karkerî (%98,18) endamê sendîka nêbîyî. No, ramocneno ke bêsendîkabîyayîş zerarê karkeran hîna keno pîl.
Goreyê malumatanê Meclîsê ÎSÎGî, serra 2024an de 1897 karkerî kar ser o merdbî.
