Emîne Ocak, a ke sembolanê Mayanê Şemeyî/Merdimanê Şemeyî ra yew bî û 27ê Gulana 1995î de mayanê verênan ra bî ke vejîya Meydanê Galatasarayî, ewro wefat kerd. Ocak, seba ke aqûbetê lajê xo Hasan Ocakî yo ke 1995 de nezaretxane de ame vîndîkerdene biperso, dest bi tekoşînê edaletî kerdbi.

Emîne Ocak, krîzê qelbî ra dima yew aşmî yo ke sekerat de bî û ameyêne tedawîkerdene.

Emîne Ocak, tekoşînê xo de tim nê çîyî vatêne:

"Mi hêvîya xo ya vînayîşê lajê xo qet vîndî nêkerde. 58 rojî dima, domananê mi qeydanê tibê edlî de resimê lajê mi dîy. Domananê mi ê resimî nîşanê mi nêdayî. Hesenê mi bêsere nêbi; la seba ke kes îşkenceyanê ke ey rê ameybî kerdene mevîno, ey Goristanê Bêkesan de defin kerdo."

Mayanê şemeyî ra peyam

Xebera wefatê Ocakî, hetê Mayanê Şemeyî/Merdimanê Şemeyî ra ameye parekerdene. Parekerdişo ke bi nameyê Keyeyê Ocakî, Mayanê Şemeyî û Komela Heqanê Merdiman (ÎHD) ame kerdene de, wina ame vatene:
“Ma mîyanê xemgînîyêka pîle de yê: Ma Emîne Ocak, a ke bi cesaret, israr û qerarîya xo vengê tekoşînê ma yê heqîqet û edaletî yo tewr bihêz bî, vîndî kerde. Derheqê merasîmê cenaza de agahî do dima bêrê parekerdene.”

Domananê aye ra peyamî

Domananê Ocakî ra Aysel Ocak wina va:

“Maya mi... Vewra mi, ti resaya lajê xo? Ti resaya heskerdoxanê xo ayê ke to her yewê înan ra dima bi hawara ke zerîya ma perçe kerdêne, oxir kerdî… La ma, ma zî germîya amnanî de cemidîyeyî mendî… Maya mi.”

Domananê aye ra Masîde Ocak zî wina nuşt: “Ma maya xo, starê xo, a ke heskerdiş û merdimîye musna ma, raymojnayoxa ma Emîne Ocak vîndî kerde. Dejê ma pîl o... Ma do agahîyanê cenaza dima ra pare bikerîm.”