ZAZAKÎ NEWS - Rêxistina Heqanê Merdiman HRANAyî, ewro 23ê Adare raporêk weşana û semedê şero ke dewam keno de malumatî pare kerdî. Reqemê qurbanan û bîlançoya goreyê welatan wina yê:
Îran
Goreyê raporî, hûmara kesanê ke zereyê sînoranê Îranî de ameyê kiştene resa 3 hezar û 230 kesan. Vajîya ke nê reqemî ra 1406ê ci sîvîl ê û mîyanê nînan de 210 zî gedeyî estê. Herçiqas rayedarê Îranî nê reqeman kêm vînenê û vanê ke 'hezar û 332 kesî merdê' zî, rapor mojneno ke bîlanço hîna zaf giran a.
Lubnan
Rayedaranê Lubnanî aşkere kerd ke 2ê Adare ra nat, netîceyê hêrişanê hewayî yê Îsraîlî de 1029 kesan weşîya xo vîndî kerda. Goreyê daneyanê Rêxistina Weşîye ya Dinya (WHO), mîyanê nê merdeyan de 100î ra zêdeyêr gedeyî ca gênê.
Iraq
Iraq de tewr tay 60 kesî ameyî kiştene ke zafaneyê nînan endamê Heşdî Şabî yê. Onca qezaya kewtişê yew teyareya leşkerî ya Amerîka de 6 leşkerê Amerîkayijî merdî. Nêzdîyê lîmanan de zî endamêkê muretebatê keştîyêka teberî (xerîbe) weşîya xo vîndî kerde.
Îsraîl
Îsraîl de 15 sîvîlî ameyî kiştene; nînan ra 9 kesan herêma “Beit Shemesh”î de netîceyê hêrişêko fuzeyî yê Îranî de canê xo da. Artêşa Îsraîlî tesdîq kerd ke 2 leşkerê înan zî başûrê Lubnanî de ameyê kiştene.
Amerîka
Pentagonî eşkera kerd ke destpêkê şerî ra heta nika 13 leşkerê înan weşîya xo vîndî kerda. Nê leşkeran ra 6ê ci Iraq de netîceyê kewtişê teyareyêkî de û 7ê ci zî wextê operasyonanê leşkerîyan ê zereyê erdê Îranî de ameyî kiştene.
Kuweyt
Kuweyt de zî 6 kesî ameyî kiştene. Nînan ra 2yê ci sîvîl ê ke hêrişanê Îranî de merdî; 4ê ci zî endamê Wezaretê Karanê Zereyî û hêzanê çekdaran ê ke wextê wezîfeyê xo de qurban bîyî.
