Resul Yıldırım

Wexto ke zemanî xo herre ro neqş kerdêne, seserran ra yew seserre bi ke koyan vayî ro zî sirrê xo bi fisfisî vatêne, sereyê 1700yan bi. Zerrîya Anatolî de, versîya koyanê Bîngolî/Çewlîge de, bi nameyê Teyrek(e) yew dewa qedîme estbî. Ena dewe ke Hezarî/Binler tede cuyayne, êdî keyeyê herrîne ke kemeran dir qisey kerdêne ra îbaret bî.

Ê keyeyanê kemerinan ra yewe de, hewt birayê bêdadî û bêbabî cuyayne. Hewt birayê lajî ke belangazîye înan ro bi çok daybî erd labelê înan veranêdayne ke rumet bigino erdî ro. Tewr qijê înan bi Kanber, xortêko hema çarês serre. Ne qij bi ne camêrd; la bi baro ke qedere wenabi ci heminan ra pîlêr bi.

Kanber şiwan bi. Kiftê ey ser o zenga verekan, zerrîya ey de yew xoverdayîşo bêveng o ke bi sebr vawitîyayo estbi. Tenatî qasê kemeranê Teyreke şinasbî ey ro. Feqet îmtîhano eslî, bi artêşgeho ke rojanê hamnanî ra yewe de verçemê Muratî de ronîyabi ra ame.

Tîme bi çekan bî. Serleşkero ke serê înan de bi, yew merdimo ke zulmî fekê xo de çarnayêne bi. Wexto ke çim verada namusê dewijan, bêvengîya ke mîyanê keyeyan de zimayêne, sey bêvengîya verê virtoneyî bî. Herkes hiş bibi. Û a hele, Kanbero çarês serreyo çimreş, sereraşt qisey kerd:

"Ez enê gureyî hel kena."

Kekoyanê xo ra cilê cinîyan waştî. Dayê xo ra. Kekoyanê xo ra va, mi biberêne kona serleşkerî û kîşta Muratî de verê ey dereyî de vinderêne. Va "Eke heta serê sibayî ez nê açarî, seba girewtişê mi çîyêk mekerêne, şêrêne."

Şewe kewte. Xeyja çimanê Kanberî heme çî tarîbi. Hêdîka/bêveng kewt zereyê kone. Zere de tayê vinderte. Serleşker ame, waşt ke rîyê ey akero. Û a hele, Kanberî xînçera ke paştîya xo de nimitbî sey virsoyî da zerrîya/sîneyê ey ro.

Serleşker hema yew qîjî nêkerdbi ke ganê xo da. Namusê yew şarî, rumetê yew dewe, qederê yew keyneke feletîya.

Kanberî hetê pey kone tîşkerd û kewt mîyanê tarîyîya şewe. Wexto ke resa zereyê dereyî birayanê ey, ey mîyanê gonî de xemilnaye dî, çîyêk pers nêkerd. Bêveng hetê koyê Karajî Ra pay şî.

Zanayne ke mergê serleşkerî veng bi heyfê kiştişî kerdêne. Roja bîne dewe veyşaye, talan bîye. Koyê Teyrek(e) hişbi. Peynî de têna zimayîşê vîrameyîşan mend.

Nîmeyê koyî de tewr pîlê înan qisey kerd:

"Ma cîya bibi. Wina herundê ma vîndî benî. Labelê wa rojêke, qijê ma zî bieşkî yewbînan vînî.

Ma yew parola biwêçîne: Şewa reş, Şiwa reş

Birayî vila bîyê. Kanber, rencan, linga ey birîndar, têna. Çarixê xo vîndî kerdî. Rayîr de cayêk de kewt û mend. Heta serê sibayî xo tênêda. Rojî vîyartî. Duran ra yewe ey temaşe kerd. Verê ey rê dest têşana. Yew şewe, o keso bisir/nimite nizdî bi. Kanberî rîyê ey nêdî.

Roja bîne gama ke ame, rîyê ey dî: yew keyneka ciwan bî. Nameyê aye Zîn bi.

Zîne yew wextî Kanberî rê nane arde, awe da ey. Yew şewe, verê ey de mende. Wexto ke bi serê sibayî nêwaşte şêra. Kanberî destê xo derg kerd:

"Bê, Zîn. Eke ma şinê ça ma şi. Ma xebetîyenî, cuyenî. Ma zewecîyenî."

Zîne qebul kerd. A game Kanberî, ver bi koyê Karajî tadaye vengda:

Koyê Karajî, koyê Karajî

Ti yê şirîkê derdê mi

Qedayê to wa mi rê bî

Wazena gule, wazena jehr

Şewa reş, şiwa reş bî

Ma rê yew parola bî

Mi rîyê aye nêdî zî

Tarî û pilok yew evîn bî

Roj wa asoyî ra werzo

Koyê Karajî roşnbo

Ma her di kewtî adir

Wa ez veyşî a nêveyşa

Kewtî rayîr. Resayê dewa Bîstine yê Çermîke. Uca de zewecîyayî, bîyê wayîrê qijan. Kanber, mîyanê şarî de sey Derviş Kanber/Kanbero Dewrêş ame namekerdiş. Rumetê ey, cesaretê ey kewt mîyanê destanan.

Eyro, qijê Kanberî ke çar terefê tirkîya de vila bîyê hema zî yenê têhet. Her kombîyayîşê înan de ê çekuyî zimenî:

"Şewa reş, şiwa reş..."

Nuştox.: Veysel Çeliker

Tirkî Ra Açarnayox: Resul Yildirim