ZAZAKÎ NEWS - Sêwas de domano 15 serre yo bi nameyê U.B. Yurdakulî, dima ke keyeyê xo de pîyê xo Suleyman Yurdakul (50) û birayê xo Mehmet Yurdakul (24) reyde munaqeşe kerd, bi demança guleyî nayî înan ro û kiştî. Hedîse de dapîra ey Nezîha Yurdakula 71 serre ya ke wextê hedîseyî de keye de bîye zî, birîndar bîye.
Goreyê xebera DHAyî, hedîse dorûverê saet 19.00î de Mehleya Mehmet Akîf Ersoyî, Kuçeyê 38. de qewimîya.
U.B.Y.yî demançaya ke keye de vîna girewt û guleyî nayî birayê xo Mehmet û pîyê xo Suleyman Yurdakulî ro.
Îxbar ser o xeylêk ambûlansî û ekîbê polîsan ameyî cayê hedîseyî. Pî û lajo ke xeylê guleyî gînayî wucûdê înan, uca cayê hedîseyî de weşîya xo vîndî kerde.
Wextê hedîseyî de, dapîra şikdarî Nezîha Yurdakule ke keye de bîye, bi îsabetkerdişê tayê guleyanê wucûdê aye zî birîndar bîye.
Cenazeya pî û lajî seba muameleyê otopsî, şawîya morgê Nêweşxaneyê Fakulteyê Tibî yê Zanîngeha Cumhuriyetî yê Sêwasî. Şikdar U.B.Y. zî hetê ekîbanê polîsan ra ca de ame tepiştene û dest bendkerdene.
