ZAZAKÎ NEWS - Koşka Sipî eşkerea kerd ke Serekê Amerîka Donald Trump, bi yew fermanêko îcrayî, zafêrê cezayanê ke serê Sûrîye de bî, do wedarno. La, ame îfadekerdene ke cezayê serê serekê verênî Beşar Esedî û tayê şexsîyet û komanê bînan do dewam bikerê.
Vervatoxa Çapemenîye ya Koşka Sipî Karoline Leavitte, kombîyayîşêkê çapemenîye de eşkere kerd ke Serek Donald Trump do fermanê wedarnayîşê cezayanê serê Sûrîye îmza bikero. Leavitte, na game sey yew hewldano seba paştîdayîşê aramî û aştîya Sûrîye name kerde.
Vervatoxa Koşka Sipî unca zî da zanayene ke cezayê serê serekê verênî yê Sûrîye Beşar Esedî û ê kesanê ke destê înan komkiştişan û bazirganîya materyalanê tîryakî (uyuşturucu) de estbi, do dewam bikerê. Eynî rewşe seba şîrketanê ke girêdayeyê rejîmê verênî yê, û seba komanê ke girêdayeyê Îran û DAIŞî yê zî derbazdar a û cezayê înan do bimano.
Karoline Leavitte îşaret bi nêyî zî kerd ke no qerar, caardîşê ê sozê ke Donald Trumpî Erebîstanê Suûdî de dabî, yo û wina va: "Serekê Amerîka paweyê yew Sûrîyaya arame û aştîyane yo, hem seba Sûrîye bi xo, hem zî seba cîrananê aye."
