ZAZAKÎ NEWS - Sazîya Îstatîstîkan a Tirkîya (TUİK), netîceyê Sîstemê Qeydê Nufusî yê Goreyê Adresî eşkera kerdî. Goreyê ney, nufusê Tirkîya heta 31ê Kanûna 2025î, 427 hezar û 224 kesî zêde bi. Nufusê newe sey 86 mîlyon û 92 hezar û 168 kesan kewt qeydan.
Goreyê TUİKî, nufusê camêrdan nufusê cinîyan vîyarna. Nufusê camêrdan 43 mîlyon û 59 hezar û 434 kes o, nufusê cinîyan zî 43 mîlyon û 32 hezar û 734 kes o. Nufusê camêrdan sey %50 ame peymitiş, nufusê cinîyan %49,98 de mend.
Riha bajaro en cîwan o
TUİKî têna zêdebîyayîşê nufusê seranserê welatî nêpeymit. Goreyê daneyanê TUİKî, nufusê en pîr ê Tirkîya Herêma Deryayê Sîyayî (Karadeniz) de yo. Sinop de emrê mîyanên sey 44 ame peymitiş.
Nufuso en cîwan de zî Rihaye reyna yewinî kesî rê nêverda. Goreyê peymitişê 2024î emrê mîyanên ê Riha sey 21,4 ame peymitiş la emser no reqem resa 21,6î. Amed de emrê nufusî sey 26,7 ame qeydkerdiş.
26 hezar kesî cîya bîyî
Derheqê zewacan de zî peymitiş ameyî kerdiş. Goreyê ney, Amed de 478 hezar û 793 kesî qet nêzewicîyayê. Nînan ra 261 hezar û 120 kesî camêrd ê. Ame qeydkerdiş ke Amed de mîyanê yew serre de 26 hezar û 490 kesî cêra bîyê; kesê ke cêra bîyê nême ra zêdeyêrê înan cinî yê. Ame tesbîtkerdene ke mîyanê 26 hezar û 490 kesê ke cêra bîyê, 14 hezar û 495ê înan cinî yê.
