Şînda Qamişloya Rojavayê Kurdistanî ra bî û Laziqîye de zanîngeh de wendêne û nameyê aye yê temam Şînda Adil Keşo bi.
Pîyê Şînda Rûdawî rê va, "Keynaya mi ya doktore odeya xo de rakewte bî û bi guleyî ameya kiştiş."
Pîyê aye aşkera kerd ke ewro heta saete yewe ya verê şodirî (01:00) têkilîya înan bîya la Şînda dima ameya kiştiş.
Şînda Laziqîye de beşê Doktorî de wendêne û wendkara sınıfa yewine bî.
Se bibi?
Şero ke mabênê eskerê Sûrîye û grûbanê çekdaran de vejîyayo de zêdeyê 70 kesî ameyê kiştiş.
Bajarê Laziqîye yê Sûrîye de mabênê grûbêka çekdare û eskeranê nika yê Wezaretê Pawitişî yê Sûrîye de şer vejîya.
Vajîyeno ke grûba çekdare eskeranê verênan yê eskerê Beşar Esed ra yena pê.
Şêwirmendîya Heqanê Merdiman a Sûrîye (SOHR) îlan kerde ke no şer û pêrodayîşan de tewr tay 70 kesî ameyê kiştiş.
SOHRî aşkera kerd ke pêrodayîşan de zaf kesî zî birîndar bîyê.
Sûrîyeya ke serra 2011 ra nata şerêkê gonin ra nêxelisîyaya reyna vênena.
Laziqîye de şer û pêrodayîşî vîzêr dest pêkerd
Hêzê emnîyetî yê Sûrîye şewa vîyarte Laziqîye de şîyayiş û ameyiş qedexe kerd.
SOHRî vatbi ke pêrodayîşanê xedar û şîdetinan yê Laziqîye û Ceblê de tewr tay 48 kesî ameyê kiştiş ke 28ê înan merdimê Esedî yê û 16 zî endamê hêzê emnîyetî yê.
Goreyê amaranê heman çimeyî, 4 sivîlî destê hêzê emnîyetî yê Sûrîye de ameyê kiştiş.
SOHRî no êrişkerdişî "Êrişkerdişo tewr dijwar o ke vera hukumdarîya newe de" awan da û aşkera kerd ke amaro kesanê ke kişîyayê tewr tay bîyo 70.
