20ê temmuza 2015î de qezaya Pirsûsî ya Riha de hetê endamanê DAIŞî ra hêrişo bombayin amebi kerdene û 33 ciwanî ameybî qetil kerdiş. Serrgêra 8. ya qirkerdişî de semedê yadkerdişê ciwanan Pirsûs û mezalanê ciwanan ser, ê ke bajaranê cîya cîyayan de yê, merasîmê vîrardişî ameyî kerdiş.
Pirsûs de bexçeyê Merkezê Kulturî yê Amara ke 33 ciwanî tede ameyî qetilkerdene de, programê vîrardişî ame kerdene. Temsîlkarê partîyê sîyasîyan, rêxistinê komelê sîvîlî û huqûqî û îdarekarê partîyanê sîyasîyan beşdarê vîrardişî bîyî.
Endamê Federasyonê Komeleyanê Ciwanan ê Sosyalîstan (SGDF) Senem Nur Pektaşe va, “Înan waşt ke xeyalanê ma nîmcet biverdê. La bi qirkerdişî nêeşkeyî verê xeyalanê ma bîgêrê. Badê 8 serran ma reyna netewa kurdan rê azadîye wazenê. Xeyalê înan bîyî xeyalê mîlyonan. Têkoşînê ma yê semedê Pirsûsî dewam keno. Xeyalê înan semedê caardişê xeyalanê înan şer kenê.”
Soner Çîçeko ke qirkerdiş de birîndar bîbî vat, “Înan waşt xeyalanê ma tîya bikerê binê erdî la fikrê ma tîya de zîl day. 33 ciwanî semedê paştdayîşê Şorişê Rojavayî tîya ameybî têhet. Ma do heta peynî wayîrê şorişî bivejîyê..”
