ZAZAKÎ NEWS - Amed de, depoyê emanetan ê qereqolê cendermeyan ra bi desan demançeyî ameyî diznayîş û çawişêko pispor ame tepiştiş. Semedê vînayîşê çekanê vîndîbîyayeyan tehqîqat dîya dest pêkerdiş.
Goreyê xebera Amîda Haberî, Edlîyeya Amedî de wezîfedarêk hîrê aşmî verê cû bi seyan guleyê keleşkofî depoyê emanetan ê dadgehe ra diznabî û rotbî.
Hedîse, Fermandarîya Cendermeyan a Qezaya Sûrî ya Amedî de qewimîya. Çawişo pispor o ke qereqol de wezîfedar bi, wextanê cîya-cîyayan de kewto depoyê emanetan û demançeyî û tayê madeyê hişberî diznayî.
Serê îxbarî, ekîbî kewtî têgêrayîş û çawişê pisporî teqîb kerd.
Edene de ame girewtene
Ekîban kamerayê asayîşî sêr kerdî û tesbît kerd ke çawişo pispor Y.B. bi poşetêk qereqol ra vejîyayo. Hêzanê asayîşî çawişo pispor nêzdîyê bajarê Edene de destbend kerd û ard Amed.
Y.B. dima kar û barê îfadeyî ame tepiştene û şawîya zindan.
Y.B.yî îfadeyê xo de îtîraf kerd ke ey tena 26 demançeyî diznay û rotê û îddîa kerd ke hayîya ey demançeyanê vîndîbîyayeyan ê bînan ra çin a.
Xeylê demançeyî vîndî yê
Hedîseyî ser o Fermandarîya Cendermeyan a Qeza, destûrê pêro personelanê qereqolî betal kerd û kewtiş û vejîyayîş qedexe kerd.
Dima ke tehqîqat ame hîrakerdene, ame dîyarkerdene ke hûmara demançeyanê ke ameyê diznayîş tena 26 nîya, xeylê demançeyê bînî û miqdarêk madeyê hişberî zî vîndî yê.
Çime: Amida Haber
