Enwer Yılmaz
Amedsporo ke semedê cezaya ke maçê Erzurumsporî de girewtebî bêseyîrcî kay kerd, vera Sêwassporî de bi futbolê xo keyfê terefgîranê xo ard. Herçiqas trîbunî veng bî zî, Amedspor zaf weş kay kerd û zerrîya terefdaranê xo yê ke verê ekranî de maç temaşe kerdêne kerd weş.
Nameyo ke mohrê xo da maçî ro, bêguman estareyo newe yê taximî Dia Saba bi. Sabayo ke wextêk formaya Sêwassporî zî dabî xo ra, vera taximê xo yê verênî de bi hîrê golan û yew asîst kay kerd. Nîmeyê yewinî de bi gola ke eşte, taximê xo vist ver; nîmeyê dîyînî de zî bi şutê xo yo mukemel o ke 25 metreyan ra eşte, îmzaya xo eşt binê gola rindekan ê hewteyî. Sabayî ke Maçkolikî ra 10 pûanan ser o 10 pûanê tamî girewtî, tena bi golanê xo nê, bi enerjî û coşo ke da kayî zî her kes xo rê heyran verda
Amedspor, bi hîrê kaykeranê bitesîran ê sey Diagne, Emrah Başsan û Dia Saba vejîya saha û ramojna nê kesî eşkena çiqas tehlukeyîn bê. Bi hunerê viraştişî yê Fernandoyî, qabîlîyetê qedênayîşî yê Diagneyî û hunerê gol eştişî yê Sabayî, Amedspor yew futbolu zaf weş kay kerd û nika ra reqîbê ey ey ra terzenê. Gola ke Morenoyî peynîya kayî de eşte zî ramojna ke kulubeya yedekan de zî çiqas kaykerê biqalîte est ê.
Herçiqas futbolbazan bêseyîrcî kay kerd zî, înan isbat kerd ke Amedspor senî wayîrê ruhêkê bêmsal o. Trîbunî veng bê zî Amesporî tempoyê xo qet vîndî nêkerd. Amedspor bin ê kayê xo emser eşkeno bibo şampiyon zî.
Amedsporo ke bi serkewtişê vera Sêwassporî moral girewt, hewteyo ke yeno do Vanspor dir kay bikero. Her di taximî zî nika form de yê. Kare Amedsporî, vera Vansporo hîrê hewteyan de 7 pûanî arê dayî de zehmet o.
