Mesud Barzanîyo ke Cizîra Botan de amo Sempozyûmê Melayê Cizîrî, semedê prosesê aştîye yê neweyî hem Erdoganî rê hem zî Ocalanî rê teşekur kerd û va: "Ma do bi heme hêzê xo paştî bidê prosesî."
Barzanî sempozyûm de qiseykerdişêk kerd û va: "Seba şima ma kerdo mêman ez zaf teşekur kena. Ewro seba ke ez ameya no sempozyum, ez pê zaf keyfweş bîya ."
"Şîîrê Cizîrî qet kehen nêbenê"
Barzanî bale ante erjê Melayê Cizîrî ser û va: "Melayê Cizîrî estareyo ke qet nêmireno. Şîîrê ey qet kehen nêbenê. Şima çiqas kewenê mîyanê şîîranê ey, şima oqas ey ra nêzdî benê. Tekkeyê Barzanî de, huzurê Mewlana Şêx Ehmed Barzanî de her tim şîîrê Cizîrî ameyêne wendene. Ma dî ke mabênê înan de têkîlîyêka manewî estbîye, çunke raya heqîqetî yew a."
Barzanî îfade kerd ke Cizîrî 70 serrê emrê xo bi bereket û îlmî vîyarno û va: "Şîîrê ey nîşan danê ke o Kurdkî, Tirkî, Erebî û Fariskî zaf baş zanayêne."
Erdogan û Ocalanî rê teşekur
Barzanî derheqê 'prosesê aştîye' ke Tirkîya de dest pêkerdo, mesajê muhîmî day.
Barzanî va: "Ma keyfweş ê ke na rey parlamento, partîyê sîyasîyî û îqtîdar paşt danê xebata aşitî. Ez Serekkomar Recep Tayyîp Erdoganî rê, şarî rê û TBMM rê teşekur kena ke înan berê aştîye kerd a; aştîye rayîyo tewr baş o. Ez Birêz Ocalanî zî pîroz kena ke ey gamê erjayeyî eştî."
Barzanî qiseykerdişê xo wina qedîna: "Wa Homa biker, no proses do bi netîceyêka xeyrine biqedîyo."
Zîyaretê Mem û Zînî
Serek Barzanî sempozyûmî ra dima şî Goristanê Asrî yê Cizîre. Barzanî tîya zîyaretê Tirba Mem û Zînî û mezelê sîyasetmedarê Kurdî Şerafettîn Elçiyî kerd.