Şêwirmendê Serekkomarî Recep Tayyip Erdoğanî Mehmet Uçum rojnamewananê Federasyonê Çapemenîya Tirkîya de ame têhet. Mehmet Uçumî kombîyayîş de derheqê prosesê aştîye, rolê Abdullah Öcalanî û xeylê babatan de qisey kerd.
Öcalan do heyet de ca bigêro
Mehmet Uçumî îzah kerd ke Abdullah Öcalan do Heyetê Caverdişê sîlehan de ca bigîro û derheqê minaqeşeyanê serê bano ke Îmraliyî de ameyo viraştiş zî wina va: “Ban girêdayeyê zindanî yo. Seba ke Abdullah Öcalan proses de rolê xo hîna weş bîyaro ca, no ban ame viraştiş. Proseso ke Öcalanî reyde yeno ramitiş dîyalog ser o yo. Kamî rêxistine viraşta wa o fesix biko. Seba aye zî viraştişê nê banî îmtiyaz nîyo, seba caardişê wezîfeyê ey lazimîyêk bi.”
Mehmet Uçumî da zanayîş ke raporê MGKyî do teşrîna verêne yan zî teşrîna peyêne de bêro eşkerakerdiş û va: “Pawîyeno ke raporê MGKyî do bireso teşrîna verêne. Teqwîm goreyê seha bêro safîkerdiş. Heyetê Caverdişê sîlehan binê koordînasyonê Serekwekîlê Serekkomarî Cevdet Yılmazî de ameyo ronayîş, do verê verî peynîya estbîyayîşê rêxistine tespît bikero û dima zî teslîmbîyayîşê çekan ser o cigêrayîş biko. Heyet do raporê xo pêşkêşê MGKyî biko; dima ke qerar Rojnameyo Fermî de ame îlankerdiş seba endamanê PKKyî prosesê muracaetî yo 6 aşman dest pêkeno.”
Heto bîn ra Mehmet Uçumî da zanayene ke weçînayîşê serekkomarîye do 16ê nîsana 2028î de bêro kerdene û Erdogan do reya peyêne bibo namzed.
