Dezgeyanê dewlete yê Dîyarbekirî de roj bi roj tabeleyan de kişta Tirkî û Îngilizkî de Erebkî zî yena zêdekerdiş la ca nêdîyeno ziwanê nê şarî, ziwanê Kurdkî.
Na hewe vejîya orte ke, Merkezê Kulturî û hunerî yê Cegerxwînî de tabela ser o Erebkî zî ameya zêdekerdiş labelê ca nêdîyayo Kurdkî. Dîyarbekir de se ra 90ê xo Kurd ê û ziwanê înan Kurdkî (Zazakî-Kurmanckî) yo.
Goreyê xebera Sur Ajansî yew merdim şîyo Merkezê Kulturî yê Cigerxwînî û dîyo ke tabele de çend ziwanî estê la Kurdkî çin a.
Qayûmî Kurdkî çîne kenê
Çîyo ecêb zî Cegerxwin şaîrêko namdar ê Kurdan o û demê Beledîyeya HEDEPî de nameyê ey ser o Merkezê Kultur û Hunerî yê Cegerxwinî amebi viraştiş.
Labelê badê ke beledîyeyan rê hetê hukmatî ra qayûmî ameyê tayînkerdiş, dezgeyanê Bledîye ra Kurdkî vera-vera amey wedaritiş.
Nika Bledîyeya ke şarî bi rayanê xo weçînita hetê Walîyê Dîyarbekirî ra yena îdarekerdiş û cayo ke bi nemeyê şarîro Kurd Cegerxwinî ameyo viraştiş de Kurdkî çîne yena hesibnayîş. Ca dîyayo Erebkî la ziwanê şarî nêameyo vînayîş.
Ocaxa Weşîye de zî ca nêdîya Kurdkî
Çend rojî verî zî qezaya Dîyarbekirî Peyas de yew Ocaxa Weşîye tabela aliqnaya tabela de kişta Tirkî de ca daya Erebkî la ca nêdaya Kurdkî.
Ewro Odaya Tabîban a Dîyarbekirî hesabê xo yê X'î ser ra aşkere kerd ke Dîyarbekir de Ocaxêka Weşîye tabelaya xo de ca daya Erebkî la ca nêdaya Kurdkî.
