Çewlîg de semedê 25ê Teşrîna Peyêne, bi serekîya Platformê Cinîyan hewa verêne "rayîrşîyayîşê şewe" ame kerdiş. Cinîyan va: "Ma hînî bêveng nêmanenê, ma do paşt bidê yewbînan."
Bi vengdayîşê Platformê Cinîyan ê Çewlîgî, bi seyan cinîyî şan Taxa Uydukentî de verê Qehweya Taraftaran de amey têhet. Cinîyan heta verê Kalium AVM rayîr ra şîy.
Mîyanê rayîrşîyayîşî de sloganê sey "Edaletê camêrdan ney, edaletê raşteqîn", "Yew kesa bîne zî kêmî nêbenê" û "Jin, Jiyan, Azadî" amey berzkerdiş.
Hînî bêvengî çin a"
Peynîya rayîrşîyayîşî de Gamze Nur Arslan eşkerayîye wende. Arslane îfade kerd ke şîdetê vera cinîyan meseleyêka sîstemî ya û wina va:
"Serran ra nata Çewlîg sey 'bajaro bêveng' ameyêne zanayîş, lahînî tîya de bêvengî çin a. Çunke cinîyê nê bajarî paştî danê yewbînan û nê têhetbiyayîşî pîl kenê. Şîdetê vera cinîyan binpaykerdişê heqanê merdiman o. Ma sey cinîyanê nê bajarî, vera her binpaykerdişî de ma do paştî bidê yewbînan."
"Seba Rojîne edalet"
Çalakîye de semedê Rojin Kabaişe ke Wan de cenazeya aye amebi vînayîş, nameyê Komîsyonê Edaletî yê Semedê Rojin Kabaişe Şevval Ulkere qisey kerd.
Ulkere va: "Roja ke Rojîn vinî bîye ra nata cigêrayîşêko aktîf nêame kerdiş. Bi vateyê 'xokiştene' (întîhar) wazenê serê cinayetî padê. Îdîaya xokiştene, perdeyê serê cinayetanê cinîyan o. Heta ke raştîye vejîya werte û faîlî bêrê bewlîkerdiş, ma do micadele bikerê."
