ZAZAKÎ NEWS - Dadgeha Îdarî ya Herême ya Erziromî, qirarê Wezaretîya Karanê Zereyî ya Tirkiya ya dûrîvistişê endamanê HDPyî yê Meclîsê Şaredarîya Tetwanî betal kerd û no qirar nêqanûnî dî.
Bado ke weçînayîşê şaredarîyan ê 31ê Adara 2019î bî, derheqê 9 endamanê Meclîsê Şaredarîya Tetwanî yê Partîya Demokratîke ya Şaran (HDP) de bi îdîaya "endamîya PKK/KCKyî" tehqîqat amebi akerdiş.
Wezaretîya Karanê Zereyî ya Tirkiya zî, bi behaneya nê tehqîqatî ê 9 endamî karî ra dûrî vistbî. Bi dûrîvistişê endamanê HDPyî, zafanîya kursîyan a meclîsî kewtbî destê AK Partî.
Na rewşe ser o, Endamê Meclîsê Şaredarîye Ahmet Sagniçî, seba betalkerdişê qirarî muracatê dadgehe kerdbi.
Dadgeha Îdarî ya Herême ya Erziromî îfade kerd ke "îdîayê ke endamê meclîsî pê yenê sûcdarkerdiş, eleqeya înan bi wezîfeyanê înan çin a", coka qirarê dûrîvistişî nêqanûnî yo.
Dadgehe qirarê xo de îşaret bi xala 127. ya Qanûnê Bingeyênî (Destûra Bingehîn) zî kerd û ard ziwan ke nêbeno ke endamê îdareyanê herêmîyan ê ke weçînîyayê, bi hawayêko keyfî karî ra bêrê dûrîvistiş.
Vajîyeno ke no qirar eşkeno seba betalkerdişê qiraranê tayînkerdişê qeyûman zî bibo nimûne.
