ZAZAKÎ NEWS - Amedsporî, kaykerdox Dilhan Demir Gençlerbîrlîgî ra bi kîra transfer kerd. Dilhan Demiro 22 serre ke Almanya de ameyo dinya, eslê xo de qezaya Çewlîgî Kanîreş ra yo û keyeyê ey Amed de ciwîyeno.
Futbolbazo cîwan Dilhan Demir, 28ê Hezîrana 2003yî de Almanya de ameyo dinya. Almanya de dest bi futbolî kerdo. Demiro ke binawanîya Wattenscheidî ra resayo, dima ke kulûbanê sey Sprockhövel, SC Paderborn II, SV Schermbeck û Wuppertaler SV de forma da xo ra, hamnanê serra 2025î de ame Gençlerbîrlîgî û pîyameyîşê 3 serrîye îmza kerdbi.
Eslê xo Kanîreşij o, keyeyê ey Amed de yo
Dilhan Demir o 22 serre nika transfere Amedsporî bîyo û bi nê transferî reyde eynî wext de agêrayo welatê xo.
Amedsporî va, ti bi xeyr ameyî Dilhan Demir
Beyanatê Amedsporî wîna yo:
Kulûbê ma, futbolwano profesyonel Dilhan Demir, Kulûbê Sporî yê Gençlerbîrlîgî ra heta peynîya sezonî sey kîra transfer kerd.
Çarçeweyê peymana ke ameya kerdene de, Dilhan Demir do heta peynîya sezonê 2025-2026î formaya Amedsporî bido xo ra.
Ma Dilhan Demirî rê demêko pûrserkewtiş wazenê; hêvî kenê ke no transfer seba kulûbê ma, futbolwanê ma û camîaya ma xeyrên bo.
