Murad Canşad
Unîversîta de, sinifa ma de, Qers ra yew wendekar est bî. Xortêko semto sempatik bî. Merdimî rê estareyê xo şîrin ameyêne. Xoşxebera xo weş bîye. Meylê xo çepgirîye ser bî la duştê fikirê her kesî de hurmetdar bî. Fikrê xo, yê her kesî ra cor nêgirewtêne. Nêvatêne ke fikro tewr rast yê min o, her kes yê mi qebul bikero. Her kesî de embazîye kerdêne xortê ma.
Qezaya Qersî Posof ra bî la keyeyê înan xeylê wext ra ver Îzmît de ca bîbî. Pîyê xo yew karxane de karker bî. Pî zerrî dabî çepgirîye, mîyanê micadeleyê sendîka de ca girewtbî. Bîbî temsilkarê sendika. Çepgirîya xortê ma zî oca ra ameyêne.
Eslê înan Axiska (Ahiska) ra bî. Ma tirkê Axiska yê, vatêne. Wextêk ra urisî ver remayê, ameyê Posof de ca bîyê.
Xortê ma zanayêne ke ez ciwananê welatperweran ra ya, doza kurd û Kurdistanî kena. Xora ma ca-ca nê meseleyî ser ro minaqeşe kerdêne. Bi nezerê ey, kurdî ganî doza Kurdistanî mekerê. Tirkîya tirkan rê zî kurdan rê zî bes yena. Ganî tirk û kurdî pîya micadele bikerê; Tirkîya de îdareyêko sosyalîst bironîyo. Îdareyo sosyalîst hewtay û hewt sereyê tirkan û kurdan rê bes yeno.
Seba Kurdistanî îtirazê xo hîna zêde dewa xo ser ro bî. Çi wext ke ta biardêne ci, hema giraneyê mi de girewtêne:
Yaw, ez ewnîyaya xerîtaya Kurdistanî ra; şima dewa ma girewta! Ma kurd nîyê, dewa ma de zî boya/qandê Heqî yew kurd bîle çin o! Çi elaqeyê dewa ma û Kurdistanî! Çi heqê şima dewa ma de est o!
Xortê ma dewa xo ser ro goştê canê mi werdbî. Tim û tim nezilîyayêne bi mi ver. Dewa ma ha dewa ma!
Ez ewnîyaya ke no doza dewa xo ra fek ver ra nêdano, mi girewt bi verê xo:
Ero bira, yê to pêro-pêsero yew dew a. Ti oca de nêcuyenê, elaqeyê şima pê nêmendo. Dewa şima ha dewijanê şima dest de. Çi yewî bi nameyê kurdan ra ci rê çîyêk nêvato. Tenya xerîta ser ro mîytanê Kurdistanî de ameya nîşan dayene. Ti seba dewa xo hende dejenê; de bîya çimanê xo ver ke yê ma qocê/hende welat o û her roce bine potînan de naleno.
Xortê ma bî gims, xorîn-xorîn nefes ant bi xo zerre. Nefes cîgeran de masa û mend. Nêzana ke bi çi çekuye ra bido teber.
A roce ra teber, fek doza dewa xo ra ver ra da, qet qisa nêarde ê meseleyî ser.
