ZAZAKÎ NEWS - Fîlmê derhêner Mehmet Alî Konarî yo Zazakî, "Demo Ke Pelê Gozan Benî Zer", Festîvala Fîlman ya Mîyanneteweyî ya Babelî ya 9ine de xelata tewr pîle, "PREMIO MAESTRALE" ya Fîlmê Tewr Başî girewte. No serkewtiş, seba sînema û ziwanê Zazakî sey yew game û averşîyeyîşêko zaf muhîm yeno vînayîş.
Fîlmo ke bi nameyê Tirkî "Ceviz Yaprakları Sarardığında" û bi Îngilîzî "When the Walnut Leaves Turn Yellow" şinasîyeno, qala hîkayeya dramatîke ya yew muxtarî û lajê ey mîyanê zorîyanê komelkî û sîyasî de keno. Fîlm, bi taybetî têkilîya mîyanê pî û lajî ser o vindeno, wexto ke pî nêweşêko giran o û hewl dano ke lajê xo seba heyatî hazir bikero.
Derhêner Mehmet Alî Konar ke senarîst û produktorê fîlmî yo, xebatanê xo de realîzm û tesîranê efsûnîyan bi hawayêko bitesîr keno têmiyan.
Verê na xelate, "Pelê Gozan" zaf festîvalanê muhîman ê mîyanneteweyî de ame mojnayîş û eleqeyêko pîl dî. Premierê fîlmî yê dinya Festîvala Fîlmî ya Göteborgî de virazîya, Tirkîya de zî Festîvala Fîlmî ya Sûc û Cezayî de ame pêşkêşkerdiş. Fîlm zafane bi Zazakî û qismêk zî bi Kurmanckî yo.
Na xelata muhîme ya Festîvala Babelî, xebat û keda Mehmet Alî Konarî û ekîba ey keyfweş kerd. No serkewtiş, reyna mocneno ke zazakî de semedê sînema û huner potansîyelêko pîl esto û eşkeno sehnayanê dinya de bi serkewtiş ca bigêro. Serkewtişê "Pelê Gozan", seba averşîyayîşê kultur û ziwanê Zazakî hêvîyan hîna pêtêr keno û beranê neweyan akeno.