Serekkomar Recep Tayyîp Erdoganî, Heyetê Îmraliyî yê DEM Partî Kullîyeya Serekkomarîye de qebul kerd. Pêvînayîşo ke çapemenîye rê girewte bi, de Wekîla Serekê Meclîsî û Mebusa Wanî Pervîn Buldan û Mebusê Riha Mîthat Sancarî ca girewt.
Zîyaret de Wekîlê Serekê Pêroyî yê AK Partî Efkan Ala û Serekê Teşkîlatê Îstîxbaratê Mîllî (MÎT) Îbrahîm Kalin zî amade bîyî. No pêvînayîşê mabênê Heyetê Îmraliyî yê DEM Partî û Serekkomar Erdoganî, çarçeweyê prosese aştîye de pêvînayîşo hîrêyin. Heyet, verê cû tarîxanê 10ê Nîsane û 7ê Temmuze de zî hetê Erdoganî ra amebi qebulkerdene.
Pêvînayîşî ra dima, hesabê medyaya sosyale yê DEM Partî ra eşkerayîya ke amey dayîş de wîna ame vatiş: "Endamê Heyetê Îmraliyî yê DEM Partî Pervîn Buldan û Mîthat Sancarî, Serekkomar Erdogan dir Beştepe de yew pêvînayîş viraşt. Heyetê ma, pêvînayîşo ke teqrîben 1 saete dewam kerd de, derheqê qonaxo ke prosesê aştîye û komelê demokratîkî resayo ci û çîyanê ke nika ra pey do bêrê kerdene de fikr û pêşnîyazê xo pêşkêş kerdî."
