ZAZAKÎ NEWS - Mayanê Şemeyî, Komîsyonê Hemkarîya Mîlî, Birayetî û Demokrasîye yê Meclîsî de ameyî goştarîkerdiş. Mayan seba cigêrayîşê aqûbetê kesê ke nezaretxaneyan de ameyî vîndîkerdiş, waştişê ronayîşê "Komîsyonê Heqîqetî" kerd.
Komîsyonê Hemkarîya Mîlî, Birayetî û Demokrasî yê Parlamentoyî kombîyayîşê xo yo 5. viraşt û goşdarîya waştiş û teklîfanê Mayanê Şemeyî seba çareserîye kerde.
Mayanê Şemeyî ra yewe Îkbal Yariciye, seba birayê xo Hayrettîn Erenî û heme vîndîbîyayan edalet waşt. Îkbal Yariciye îzah kerd ke armancê înan caardişê edaletî yo û waşt ke yew komîsyono ke ê bi xo zî tede ca bigîrê, bêro ronayîş.
"Înan pîyê mi bi zorî eşt yew Torosê sipî ro"
Besna Tosune ke a zî beşdarê kombîyayîşê komîsyonî bîye, hîkayeya vîndîbîyayîşê babîyê xo Fehmî Tosunî pare kerde û va:
"Maya mi dîyo ke hîrê kesan bi zorî pîyê mi eşt yew Torosê sipî. Ma eynî wext de qîrayîşê dadî û babîyê xo eşnawit. Tûtê ma yo tewr qijkek 5 serre û yo tewr pîl zî 14 serre bi. Ma bi lez şîyî waro, înan bi zorî pîyê mi kerdêne otomobil zerre."
Tosune da zanayîş ke 30 serrî yo ke kenê ke derheqê aqûbetê babîyê xo de çîyêk bimusê, la gêrayîşê înan ê huqûqî ra qet yew netîce nêvejîyayo û heme sazîyanê dewlete destbendkerdişê babîyê aye înkar kerdo.