ZAZAKÎ NEWS - Goreyê cigêrayîşê şîrketê KONDAyî, Tirkîya û Bakurê Kurdîstanî de se ra 46ê beşdaran wazenê ke "heqê kulturî yê Kurdan" bêrê dayîş.
Şîrketê Cigêrayîş û Şêwirmendîye yê KONDAyî, netîceyê cigêrayîşê xo yê bi nameyê "Meseleya Kurdan de Çimê Çareserîye" eşkere kerdî. Cigêrayîş, mabênê 24-27ê Nîsane de, 77 şaristanan de, pa bi 2 hezar û 620 kesan reyde virazîyabî. Netîceyê cigêrayîşî, merkezê Komeleya Heqanê Merdiman (ÎHD) ê Anqare de, bi beşdarîya Hemserekê ÎHDyî Huseyîn Kuçukbalaban û Serekê C KONDAyî Aydin Erdemî ameyî eşkerekerdiş.
Goreyê cigêrayîşî, her 10 kesan ra 8 kesan vato, “Ganî Tirkîya de pêro kesî wayîrê heqanê hempîyayan bê.” La wexto ke mesele yena "heqanê kulturîyan ê Kurdan", ser na hûmare bi hawayêko cîddî kewena war:
- %46 va, wa heqê kulturî yê Kurdan bêrê dayîş.
- %36 vera dayîşê nê heqan de yo.
- %18 zî nê babetî de fikrê xo eşkere nêkerdo.
Cimat do seba çareserîye senî îqna bo?
- %21: Bi temînkerdişê azadîya îfade û fikrî.
- %10: Bi rî bi rî bîyayîşê bi vîyarteyî reyde.
- %7: Bi beşdarîya komelê sivîlî ya prosesî.
- %4: Bi azadîya medya.
Dewlete ganî çi gaman bierzîyo?
- Çekverdayîşê PKKyî: %28
- Vurnayîşê Qanûnê Esasî: %23
- Beşdarîya Parlamento: %20
- Heqê Hêvîye yê Ocalanî: %12
- Efûyo Pêroyî yo Sîyasî: %7
Seba aştîya komelkî ganî çi bêro kerdene?
- Peynîbîyayîşê şîdet û cengî: %59
- Azadîya îfade, medya û akademî: %49
- Garantîyo qanûnî seba prosesê çareserîye: %33
- Naskerdişê heqanê etnîkî û kulturîyan ê pêro komelî: %31
- Vurnayîşê tarîfê welatîyîye: %25
- Zêdekerdişê rayberîyanê herêmîyan: %19
- Veradayîşê girewteyanê sîyasîyan: %17
Eke meseleya Kurdan çare biba, se beno?
- %50 ra zêde vato ke "Azadîya îfadeyî, heqê merdiman û demokrasî do aver şirê."
- Unca zî %50 ra zêde vato ke "Sîstemê mehkeme û ekonomî de qe yew vurnayîş nêbeno."
