Sînan Sutpak Qezaya Riha Hîlwan ra yo û no 30 serrîyo ke hepisxane de yo.
Hepsîyo sîyasî Sînan Sutpak goreyê prosedorê qanûnî gere hetanî nika biamêne veradayîş la çend reyîyo ke veradayîşê ey taloq beno.
Goreyo ke vajîyeno, semedo ke poşmanîye qebul nêkeno nêno veradayîş.
Sînan Sutpak qezaya Hîlwanî ra yo, o wext Riha de tepişîyayo û ey rê serra 1993î de cezaya hetanî-heta ameybî dayîş. Herçiqas zî ey înfazê xo temam kerdo zî vera nêdîyeno.
Sînan Sutpak hetanî nika hepisxaneyanê Riha, Semsûr, Bursa, Mereşî de mendo. Tewr peynî sewqê hepisxaneyê Yozgatî bîyo. Sutpak gereke 3ê gulane de biamêne veradayîş la bi raporê Heyetê Îdare û Çimdarîye, înfazê ci qasê 3 aşmgan ame taloqkerdiş.
Goreyê îdareyê hepisxaneyî “Meylê ci yê sûckerdişî est o.''
Sînan Sutpak hetêk ra zî nuştox o û bi Zazakî nuşteyan nuseno zî.
Tewr peynî kitabe ey o bi nameyê “Jûtenya” weşanxaneyê Aramî ra vejîyabi.
Ey, sere de Kovara Vateyî, xeylê kovar û rojnameyan rê bi serran nuşteyê Zazakî nuştê û hema zî zazakî ser o xebatanê xo rê dewam keno.
Zazakî News
