Şaredarîya Peyasî ya Amedî, Parka Medya de 'Heykelê Cinîyanê Xoverdayoxan' ke sîmgeyê xoverdayîş û azadîya cinîyan o, bi merasîmêk kerd a.
Şaredarîya Peyasî 'Heykelê Cinîyanê Xoverdayoxan' (Direnişçi Kadınlar Heykeli) pêşkêşê şarî kerd.
Merasîmê akerdişî rê Hemsereka Şaredarîya Peyasî Berîvan Gulşen Sincar, Rêxistina DEM Partî ya Peyasî û temsîlkarê dezgehanê komelê sivîlî tewrê ci bîy.
Akerdiş de Hemsereke Berîvan Gulşen Sincar qisey kerd. Sincare da zanayîş ke şaredarîyanê DEM Partî serra peyêne de 90 ra zêde dezgehê cinîyan kerdê a.
Sincare bale ante polîtîkayanê şîdetî ser û wina va: "Vera polîtîkayanê qirkerdiş û şîdetî de cinîyî kuçeyan û meydanan de têkoşînê xo domnenê. Goreyê daneyanê BMyî yê 2024î, dinya de nêzdîyê 50 hezar cinî û gedeyî ameyê qetilkerdiş. Ma do vera qirkerdişê cinîyan têkoşînê xo bidomnê."
Qiseykerdiş ra dima cinîyan pîya perdeyê serê heykelî wedarit. Akerdiş bi sloganê "Jin, Jiyan, Azadî" qediya.
