Qeyûmê Beledîyeya qezaya Bismilî ya Dîyarbekirî, tabelaya bi Kurdkî ya ke dekewtişê Taxa Seletî de ameybî ronayîş û ser o “Hûn bi xêr hatin” nuştebî wedarit û herinda ci de tabelata bi Tirkî na ro.
Taxa ke verê cû Nehîye bî de serra 2015î de hetê Partîya Aşitî û Demokrasî (BDP) ra tabelaya Kurdkî (Kurmanckî) ke ser de “Hûn bi xêr hatin” (Şima bi xêr ameyî) ameybi nuştiş, ameybî ronayîş.
Serekê Beledîyeya Bismilî yo verên Orhan Ayaz o ke herinda ci de qeyûm amebi tayînkerdiş vera na kerdêna Qeyûmî hêrsê xo nîşan da.
'Poltîkayê înkar û çînekerdişî yê'
Orhan Ayazî va ; "Wedaritişê tabelaya bi Kurdkî polîtîkaya înkar û çînebîyayîşî mojnena. Vera ziwanê Kurdkî, bêtehemûlî dewam kena. Hetêk ra îradeyê şarî çîne hesbinenê, herinda weçîniteyan qeyûman tayîn kenê hetêk ra zî nasname û estbîyayîşê şarêkî çîne hesibnenê. Ma do vera na hişmendîya qeyûman micadeleyê xo rê dewam bike."
