Celalî Çelîk
Edebîyatê zazakî de şaîrê cinîyî goreyê camêrdan zaf şenik ê. Şîîrê şaîranê cinîyan de hîs û problemê cinîyan babetê bingeyin ê. Ewro edebîyatê zazakî de cinîyan cayê xo dîyar kerdo û rengêko newe dayo edebîyatê zazakî. Înan ra yewe zî Pinar Ozgul a.
Kitabê Pinar Ozgule "Awe û Adir" serra 2025 de Weşanxaneyê Babekî ra vejîya û kitab 240 rîpel o. Şîîrê ke nê kitabî de ca gênê hem zazakî yê û hem zî almankî yê. Şîîrê ke bi almankî ameyê çapkerdene, eslê xo de zazakî yê û hetê Mahîr Doganî ra ameyê açarnayene.
Nuşteyê daşinasnayîşê kitabî de wina ame vatiş:
"Babetê şîîranê Pinare de hem derdê însanî hem kî omid, xoverodayîş, destdayîş û bextewarîye ca cênê. Bi zerrîtenikîye a nê babetan çekuye bi çekuye reşena çarnena mecazanê candaran. Zonê zazakî, nê şîîran de reyna yeno ra can û bi çarnayîşê xo yê almankî dîaspora de reyêna yeno dînya."
Şîîranê Pinar Ozgule ra nimûneyêk:
Rinde
Rinde, royê'm to de mij û duman o
Têmîyakewte wo, halê mi yeman o
Serê zerrîya mi to de henî peyman o
Ez maşiqê tü yo, hayrê xo nîyo.
Ze Xizirê kalî to ra nezdî cîran o
Ze wayîre çêyî to ra her roj ayan o
Ez zano ke emrê mi to rê talan o
Ez maşiqê tüyo, hayrê xo nîyo.
Pinare, çimê mi ver a mekuyê dûrî
Destê mi bijê şîmê çemê Munzurî
Ma'ra eşkera bo dar-kemerê Duzginî
Ez maşiqê tü yo, hayrê xo nîyo.
Îqrarê to zalim o, maşiqê to bîyo
Gunekar o, xetekar o, jüyo sêwî yo
Tobekar o, bindestê nefsê xo bîyo
Ez maşiqê tü yo, hayrê xo nîyo.
