Pêroyê Tirkîya de weçînayîşê odayan û borsayan ke çar serran ra reyêk virazîyeno, dewam keno. Badê weçînayîşanê Borsaya Ticaretî, endamê Odaya Ticaret û Sanayî ya Dîyarbekirî (DTSO) seba weçînayîşê îdareyê dewrê neweyî û Komîteyanê Meslekî şîyî serê sindoqan.
Mîyanê 26.515 endamanê DTSOî de, 9.946 endamê ke heqê înan ê weçînayîş û weçînîyayîşî estbî, seba şuxulnayîşê rayê xo mekteban de ray day. Gureyê raydayîşî qezaya Yenişehirî de, Mektebê Mustafa Kemal Îmam Hatipî de ame kerdene. Mîyanê 9.946 endamanê ke heqê raydayîşê înan estbî de, nêzdîyê 4 hezar endamî şîyî serê sindoqan.
Badê gureyê raydayîşî yo ke saete 17.00 de qedîya, dest bi hûmarbîyayîşê rayan ame kerdene. Mehmet Kaya bi rayê nêzdîyê 4 hezar endaman seba reya hîrêyine sey Serekê Odaya Ticaret û Sanayî ya Dîyarbekirî ame weçînayîş.
